玩密室逃脫考驗Friend之默契@新活時報Miss Sunny

Jul 26 2016

撰文：新活時報Miss Sunny　攝影：Yiu

(Presented by LOSTHK)

我Miss Sunny最愛自己shopping之餘，更加鍾意同班friend周圍食周圍玩，不過去得多都悶，就好似同一班friend去食飯後，唔想直落打機睇戲咁悶，大家就會企咗喺度，一齊諗去邊好，有次正當我想話走先，有個friend就提議去玩下真人密室逃脫遊戲，話一班朋友被鎖喺密室房間入面，尋找線索去解謎，但我心諗仲後生咩邊啱玩，不過費事拒絕咪照去囉，點知又出乎意料咁好玩，過程中仲刺激到大家嘅智慧、溝通、合作同觀察能力，仲試到大家嘅性格。首先係，你同你班friend又經唔經得起考驗先?

打機 vs 高科技設計

我個打機朋友同我講，其實喺手機唔難搵到呢類密室逃脫遊戲，要搵提示只需用手指喺mon度周圍篤。不過excuse me，Miss Sunny就覺得同真人密室逃脫遊戲爭好遠，真人化身故事主角，運用智慧同觀察力加上邏輯思考，喺限定時間內逃離密室，刺激好多。

我地去嗰間係叫「迷の密失LOST」全球有8間分店，喺香港銅鑼灣旗艦店有7個唔同嘅故事主題密室，今個暑假仲會開多3間房，聽聞係全港最多game room嘅密室逃脫，遊戲入面嘅提示同解謎已融入高科技技術，包括電子設備、傳感器、激光和紅外線燈等等，仲有中、英雙語提示，就算唔同國籍人士都可以玩。仲有個秘技，大家如果想玩又唔想使錢，可以叫公司運用真人密室逃脫遊戲嚟做企業培訓，好多公司試過㗎。

豬的隊友 vs 神的隊友

我地玩完呢個密室逃脫遊戲，就覺得係一齣朋友現形記。喺7個密室入面我地就揀咗「Alcatraz阿爾卡特拉斯」，想試下逃獄嘅感覺，入到去個setting又真係好似坐監咁喎。

講番我班friend，我朋友A平時份人係成日唔出聲跟大隊，點知去到個密室就好似隊長上身，當所有隊友冇晒辦法，佢反而IQ爆棚，識得用支槍瞄準開關，成功逃離。而朋友B啱啱相反，平時最愛話事，喺密室反而定晒格，驚做錯決定俾人喪插，性格露晒底。我同朋友C就似足平時都係跟大隊，不過就驚青啲，預到啲難題就企咗喺度。45分鐘朋友真人show，大家真係要有心理準備。