炎夏火辣滋味│人氣熱情地道 川菜 ＠Dining娜
Photo：Barry
香港愈來愈多人愛食 川菜 ，近年更多咗一班年輕食客捧場。天府人家就係其中一間做法傳統正宗嘅川菜館，大部分師傅班底來自四川，而且曾經喺香港嘅著名川菜館擔任廚師，烹調嘅川菜極富地道火辣熱情嘅特色，麻辣、香辣並重，招牌菜如四川干鍋、獨蒜泡椒田雞、酸菜桂花魚等經典川菜，都做得出色到家，深深吸引嗜辣客人。
川味靈魂
天府人家嘅老闆係四川人，對正宗川味尤其講究。店主務求突出四川風味，請來一班來自四川嘅師傅坐鎮，佢地更曾於擁有近廿年歷史嘅著名川菜館擔任廚師，能烹調一手正宗川菜，經驗豐富。另外，食材亦係重點，呢度大部分食材如泡椒、獨子蒜；香料如花椒、乾椒、酸菜等，都係購自四川。師傅表示，只有當地嘅食材味道先夠濃郁同有獨特風味，香港貨完全比唔上！
清湯加入獨子蒜、泡椒、紅油熬製湯底後，再放入蓮藕、窩筍和田雞，香辣入味之餘，田雞仍保持肉嫩爽滑。
干鍋屬必食特色川菜，以大量四川靚辣椒、花椒炒干鍋，再加入炸過嘅豬大腸同炒，爽身惹味，辣度十足！
湯底由四川酸菜、小米椒和泡薑等十多種材料熬製，再加入新鮮桂花魚同煮，魚肉鮮嫩彈牙，記住要連湯食啊！
川菜 風味地道、材料靈活多變
天府人家嘅師傅強調，佢地嘅烹調方法地道正宗，不經改良。例如一道青椒冒菜雜錦鍋，就貫徹採用清湯做湯底，加入雞肉、金華火腿、辣豉油同自家製醬料等熬製，風味鮮甜濃郁。冒菜雜錦鍋材料大部分亦來自四川，包括湖南青椒、白毛肚、豬大腸、牛𦟌、黃喉、黑豚肉、蓮藕片、鴨腎、牛筋、午餐肉，材料超過十款，豐富又飽肚。
為了更吸引港人口味，師傅在部分川菜用料，會作出靈活多變的配搭，選用港人喜愛的食材，例如招牌菜毛血旺便加入了鮑魚，這點絕對加分！所以除了不乏香港嗜辣朋友，亦吸引內地食客幫襯，尤其是四川客喺呢度都食到家鄉風味。
除了地道川菜，天府人家亦有麻辣火鍋，唔使多講，一樣四川風味十足，麻、辣、香滋味各不相讓。
冒菜即是用湯汁煮成菜餚嘅四川特色菜，這道雜錦鍋有湖南青椒、白毛肚、黃喉、牛𦟌、午餐肉等，用料豐富。
羊腩拌入花椒、八角、桂皮等燜至軟腍再燒，味道已夠濃郁香口，最後灑上孜然粉，羊腩風味更突出。
糯米蒸後加入火腿蓉醃製，鋪上煙燻嘅鴨片蒸完再炸，香脆鬆化，蘸自家製甜醬一齊食，香甜惹味。
涼拌川菜，用辣椒、麻油等拌勻韭黃以及質感似豆乾嘅雞蛋乾，微辣醒胃，夏天食感覺透心涼。
舒適雅致、古樸風味濃厚
以古色古香為設計主題，係天府人家嘅一大特色。全店採用木製雕花家具，以深淺啡色、雞蛋黃色等和暖色系作主調，再配上中國水墨畫，雅致古樸嘅氣息令人舒服自在。
天府人家
地址：灣仔盧押道18號海德中心3樓（謝斐道入口，港鐵灣仔站C出口）（顯示地圖）
電話：2205 0020
備註：設加一，收現金及信用卡。
