膽量挑戰玩 溪降 ! 遊繩、跳潭、飛索樣樣齊!
撰交：Mandy、Keith｜圖片：Mark、Tommy
1. 馬大石澗玩 溪降 跳崖、飛索全部齊！
今次試玩的活動叫溪降「Canyoning」，與近年行山友間大熱的行澗不同，溪降是由教練帶領下，由上游，用瀑布沿繩下降、跳潭及順水下滑等方法走向下游。當中會用上攀山裝備，亦會佩戴頭盔及助浮衣，故比自己行澗安全。
首先派出記者Mandy及Sam挑戰位於馬鞍山的馬大石澗，全程約5小時，作為新手的我們，進行高危活動當然要跟實教練。
要威當然要戴返個頭盔先至安全，出發前教練會先講解下降技巧和原理，幫助大家試穿裝備，並讓大家練習游繩，做足準備才出發。
由馬鞍山郊遊徑出發，幾分鐘便步行到石澗入口，最初的半小時路程比較平坦，輕輕鬆鬆就可以完成。
教練會安排學員於較淺水地方實踐遊繩技巧，確保大家掌握後再繼續行程至瀑布。
天然滑梯
途路有機會遇到較易跣腳的路段，反而可以利用這個地勢，成為一條天然滑梯！
飛簷走壁
遇到合適的地形，教練會鼓勵大家以較大膽的方式前行，當然，細膽的學員亦可選擇較簡單的路線，不過一場來到，就挑戰一下膽量吧！
打大佬！10米瀑降！
經歷了幾次小練習，最後來到了終極打大佬，挑戰10米瀑降！由瀑布上方向下望，真的想放棄，因為真的太！高！了！還好助教會在瀑布中段作出指導，可以稍作休息再下降。
來到這個階段，腳長的朋友仔有完美的優勢，因為腿張開就可以撐著兩旁的石塊，下降得較為輕鬆；相反，腳短的朋友仔，就要靠自身平衡以及手腳並用地撐著石塊，比較「論盡」。
大家可能未必想像得到水勢有多大，以第一身角度看就比較清晰了吧。正所謂欺山莫欺水，記者第一次感受到水的威力，打在身上有刺痛的感覺，所以教練一再提醒，千萬不要與水流對抗，要小心穩定自己，最壞的打算就是跳下水，也不要與之鬥力對抗。
徒手攀岩 跳6米高崖
挑戰完瀑降，又來到了另一膽量挑戰。跳潭是行澗熱門活動，但行山友往往無準備就跳，其實好易出事。事前教練們已經測試潭中水深及了解潭底情況，確保適合跳潭才會進行。首先要攀上6米高的岩石上，再跳下來，細膽少少都應付不來。畏高的Mandy就表示無膽挑戰，所以派出了不怕死的Sam挑戰跳崖。
一場來到，當然要挑戰一下膽量、突破自己，所以Mandy亦挑戰了另一個約3米高的跳水位，總算突破了畏高的恐懼。
一定要試！飛索體驗！
來到Mandy和Sam最喜歡的部分了！教練會在瀑布頂部拉起繩索，連到水潭的另一邊，形成一條空中飛索，學員可以選擇完全放手自由落體，亦可以選擇慢慢放繩，自行決定速度。貪玩的我們當然是完全放手，幾秒就滑下來了！
我們兩個都認為，飛索是整個過程中最刺激好玩的，而且又有繩索及教練指導，不像跳崖般考膽量，既安全又刺激，最適合貪玩又怕死的我們。出發前，本來以為是體能的挑戰，但發現原來考膽量的成分比較多，是一趟突破自己之旅。
馬大溪降體驗
費用：$680
查詢：5405 4960
Facebook：香港攀岩歷奇
網址：http://www.hkrca.com
2. 挑戰粉嶺「死神石澗」
除了馬大石澗，今次記者Keith同Model去到有「死神石澗」之稱的粉嶺屏南石澗玩溪降 「Canyoning」，由上游經瀑降、跳潭及滑水，一路玩到河口。屏南石澗瀑布水量多，刺激好玩，吸引不少人去挑戰膽量，但亦曾發生不少意外，故有「死神」之稱。
屏南石澗全程約4小時，途中會有三處瀑降，最矮也有2層樓高，主瀑更達10米，毒宅記者及纖瘦Model未開始先淆底，站在瀑邊向下望，心諗點落呀？好彩教練全程傍住，加上游繩下降原來非常穩陣，速度由自己控制，慢慢落都得，終於順利作出人生第一次。
到了最後打大佬，10米高的主瀑草群瀑水量多，下降時有大量水「兜頭淋」，夠晒刺激，夏天玩真係激爽。教練話只要唔怕水唔畏高，唔識游水都玩得，新手都應付自如。
屏南一樣有得玩飛索
與一般飛索不同，Canyoning飛索要自己放繩控制速度，並非一味失速飛行。你可以不斷放繩飛越滑行，亦可慢慢飛享受飄浮半空的滋味。不過飛索活動並非次次有得玩，要視乎參加人數及溪流水量而定，想玩記得出發前向教練查詢。
跳潭要壓水花
屏南有兩個跳水位，一個有兩米高，屬新手細膽位，另一個高達8米，大膽友必試。記者當日淆底只跳新手位，跳時記得按實鼻子，否則一定「濁親」。
水上樂園有滑水梯，屏南石澗亦有一秒滑梯。記者親身試過，因為斜到接近垂直，基本上是一秒直插落水。玩時全身伸直瞓低，由教練推你一把，當時「生死大權」唔到你話事，完全唔知幾時會下滑，到你意識到滑行中，下一秒已經入咗水。
屏南溪降體驗班
費用：$600(平日)、$650(周未)
查詢：9710 1500
Facebook：Keen Eye Canyoning 銳眼峽谷偵察隊
備註：每月約有10多日選擇，4人成團出發
想知更多好玩旅遊、生活資訊，留意Mandy facebook專頁：
想知更多吃喝玩樂、扮靚資訊，就快d like Sam拍胃 facebook page啦！
