【港鐵通車45周年】深入探索港鐵隱藏秘景！帶你揭開彩虹站中間路軌都市傳說＋觀賞第一代車廠控制室
彩虹站中間路軌都市傳說 為你揭開禁區之謎！
多年嚟彩虹站中間路軌都有唔同嘅傳聞，即使港鐵曾經喺2016年發佈影片證明路軌可以通往九龍灣車廠，但大家依然深信路軌係因為怪事而停用。為咗打破謠言，今次，港鐵隱藏秘景探索隊帶大家了解彩虹站中間路軌嘅使用情況同第一代車廠控制室，仲有條航拍影片以第一身視角會帶大家參觀九龍灣車廠，揭開禁區之謎！
立即去片一齊探索港鐵隱藏秘景：
小彩蛋：今次港鐵發布嘅航拍片係由專業團隊及持牌無人機機師制作，係咪拍得好有型呢！
封存20年被喻為「冰封塔」 帶你穿梭時空參觀港鐵第一代控制室！
參加完港鐵隱藏秘景探索隊先知道，彩虹站中間路軌其實可以通往港鐵首個車廠—九龍灣車廠，而已經封存咗超過20年嘅第一代車廠控制室就係位於車廠北面嘅控制塔頂層。呢個被喻為「冰封塔」嘅第一代車廠控制室1979年正式開始啟用，直至2003年第一季停用。雖然已經停止服務超過20年，但控制室內𥚃嘅物件環境依然保存着昔日初建嘅風貌，個時空就好似被冰封一樣，仲停留緊喺20年前。
今次港鐵仲特別邀請到以往喺該控制室工作嘅退休車廠主任大岳哥分享，控制室內嘅車廠調度員會喺車廠控制室負責九龍灣車廠中嘅列車調度，無論係列車出入車廠路線、停泊安排、維修編制等等，全部都會由該控制室安排，一年365日全年無休㗎！
大岳哥更指當年控制室內每更8小時只會有一位同事值班，所以會畀人一種「與世隔絕」嘅神秘感，不過控制室內配備微波爐、熱水爐、冰箱等等設備，可以話係「麻雀雖小，五臟俱全」！
元祖級九龍灣車廠
除咗港鐵隱藏秘景探索隊外，港鐵發佈嘅航拍片帶大家探索更多，睇更多港鐵隱藏秘景探索隊無睇到嘅畫面。九龍灣車廠由1979年投入服務，係港鐵第一個車廠，亦好似市區綫列車維修嘅心臟地帶。市區綫列車會匯集喺車廠作日常「體檢」，而列車維修醫生就會全年無休地為列車進行檢查同維修，他們對每部列車中數以萬計的零件都瞭如指掌㗎！
睇完之後係咪解開咗大家好多埋藏喺心目中嘅疑惑呢？嚟緊仲將會公開更多港鐵秘景㗎，有興趣嘅朋友記得要密切留意住港鐵Facebook同埋Instagram喇～
(Presented by MTR )
