老餅 @ 梁栢堅

－ 梁栢堅

梁栢堅 ：添丁酒樓 貪好意頭

五六十年代出現嘅酒樓，有堆好鍾意用個「男」字：多男、添男、得男酒樓，貪生仔好意頭，依家，
呢類名只可以用嚟做基吧。

中式餅家年代

九十年代之前，香港有好多中式餅家，當年邊有咁多連鎖西餅店，做得月餅，通常都係中式餅家又或者酒樓，所以月餅盒都係好中式嘅，最常見係嫦娥、八仙過海、有朵花之類，係喇，呢啲嘢就係長輩圖嘅前身。

「供月餅會」

以前有樣嘢叫「供月餅會」，即分期付款， 唔使餅數一筆清（以前啲人唔係可以下下攞一大筆錢用嘅），而呢樣嘢亦隨住社會富裕消失，啲人仲癲到團購㖭。

紙做月餅盒

第一代月餅盒，其實係用紙做，而當時嘅月餅，好鬼多豬油，即使隔住張包月餅紙，都會滲咗落紙盒。喺我收藏當中，有一個「雙喜樓」餅盒，全世界應該剩返冇幾個。雙喜樓，老灣仔冇人唔識，地點就係依家地鐵站電車路出口，修頓對面，九十年代消失。

而家環保團體話月餅罐非常浪費，但以前邊有人會掉月餅盒？全部用嚟放嘢，直到生鏽為止。當然，一部分係畀我哋拎咗去煲蠟，煲蠟應該申請做聯合國非物質文化遺產。（另，有一年有個細路搵咗啲白蠟燭嚟煲，嚇親幾多師奶）

－ 梁栢堅