旺角呢個地方已經唔屬於香港人 @藍橘子
廣告
曾幾何時，旺角係好多香港人都鍾意嘅地方。
唔知幾時，香港人經過旺角愈行愈快，好想盡快離開呢個地方。
點解？因為而家嘅旺角，已經唔係屬於香港人…
記得我嘅中學時期，幾乎每日放學都會去旺角，雖然旺角畀人感覺品流複雜，但喺年輕人眼中旺角真係應有盡有。學校老師成日都叫學生「放學唔好去旺角！」。但放學時間，成個旺角總係塞滿晒唔同學校嘅學生。
旺角呢個地方已經唔屬於香港人
以前仲係老翻碟嘅年代，去好景、信和一班同學夾錢100蚊6隻Game碟…好景樓下有車仔攤販賣25蚊一盒老翻GameBoy帶。想溝女買禮物，可以去潮流特區幾十蚊整個刻名嘅木牌，大膽啲可以叫老闆加個心心落去。
學生哥得幾十蚊零用錢，但旺角總會食得飽你，因為好多商舖都有「學生價」五蚊大大杯珍珠奶茶，魚蛋、燒賣、炒米粉通通都係五蚊…嗰個年代真係拎住幾十蚊就可以「掃街」。有時唔知有咩好做，只係想hea吓先返屋企，但旺角足夠你hea足全日。
而家呢？放假出到去旺角，成條行人專用區都係跳大媽舞或者唱懷舊歌，呢邊廂音響開到最大聲，那邊廂就更加大聲。每次我經過呢條行人專用區，我只係想急急腳離開。
(上圖是誇張例子)
想行街買衫，家樂中心都變埋H&M，瓊華中心變咗先施，愈來愈多大型倒模式商場，愈來愈少自家小商店，旺角變得無晒特色。
以前覺得「MK仔」係一個扁義詞。
而家諗深一層，其實MK又有乜唔好？潮流又快、夠平靚正…呢樣正正就係香港嘅特色。
我第一次追女仔喺旺角買禮物，第一次入機舖都係旺角。旺角畀咗我好多回憶，但從此以後亦只能回味。
點解而家會覺得旺角唔屬於香港人？
因為好多商場餐廳…已經唔係為咗香港人而設。
ig：BlueGodZi
