【手機降溫方法】10円硬幣有助散熱！預防「手機中暑」｜專家：超過40℃會燙傷

撰文：Carmen｜圖片來源：Yahoo！Japan、網絡｜編輯：sandy

用傳熱性高嘅金屬散熱

手機熱到死機時，相信好多人都會即刻用冷卻劑等將手機「急凍」降溫，但咁樣做分分鐘令手機更「短命」！急凍會令手機內部結霜，成為故障嘅原因。

最好嘅手機散熱方法，就係喺發熱嘅部分貼上傳熱性高嘅金屬，透過金屬錢內存熱力釋放。

傳熱性高嘅金屬有金、銀、銅等，平時身上哪來的金、銀吖，咁就不妨試下用銅！

日本「神沙」散熱大法

大家次次去完旅行都想盡辦法散走嘅「神沙」硬幣，其實仲有散熱用途！日本就有一個「10円散熱法」，將10円硬幣放喺手機背，如果得好少喺手，只放喺發熱部分都會有一定效果。要拎住手機行嘅話喺硬幣上用膠紙貼住就可。

手提電腦嘅話，就喺發熱部分盡可能地放置10円。咁冇日幣10円喺手嘅話點算？香港硬幣嘅話，毫子嘅含銅量較高，可以試下用毫子代替10円！

手機溫度過高會出現「低溫燙傷」！

日本消費者廳就曾經為暖水袋嘅潛在危險性進行過調查，發現會造成「低溫燙傷」嘅溫度同接觸時長如下：

・44℃⋯3～4小時

・46℃⋯30分鐘～1小時

・50℃⋯2～3分鐘

不同於高溫燙傷時會即時縮手，低溫燙傷係會逐少咁滲入到皮膚，好遲先會發現到皮膚赤痛。

以Apple手機為例，iOS系統嘅最佳運作溫度為0～35℃，放置保管時環境溫度為-20℃～45℃，而開始出現「唔聽話」情況嘅，約為40℃左右。另外，防水設計嘅手機因為密封度高，所以需更小心留意發熱情況！

如果發現手機溫度過熱，最好嘅降溫方法就係熄機，等一陣先再開番。而且要謹記，手機唔好喺陽光下暴曬或者放喺悶熱地方，亦該避免長時間緊貼皮膚，預防「低溫燙傷」。