女友成日嫌我唔夠好， 情人節冇送禮物 就分手@藍橘子

每次同佢食飯，女朋友都會舉好多例子，唔係叫我學邊個，就係叫我睇人哋男友有幾叻幾有錢。

「Amy個男友Davy啊！最近又換車喇！好心你上進啲啦！我同你拍咗5年拖，你份糧連通脹都追唔到啊！」女友說。

女友成日嫌我唔夠好， 情人節冇送禮物 就分手

「其實呢……當初我都係用呢份糧嚟追你啦，你都冇嫌棄我咁多嘅。」我說。
「時代會進步，人會變㗎嘛！」女友說。

「時代會變～人會變～但我對你嘅感情永遠都唔變！沙冷hea！」

今日係2月14日，情人節。時間係晚上7點34分……
我喺女朋友面前，搞咗個爛gag，同埋擺咗個韓式心心手勢，諗住可以哄番佢。

點知……
餐廳內一聲巨響，女朋友從未試過咁大力拍我枱。全餐廳嘅情侶望晒過嚟。

「BB，今日情人節，不如我哋唔好鬧交吖……」
「你都知今日情人節啊可？咁你有冇送禮物俾我啊？你睇下周圍啲人吖，全部都攞住紮花㗎！你呢？蕉都冇1梳啊！」女朋友越鬧越激動。

「我咪係你份禮物囉！親～」晚上7點35分，我決定搞多個爛gag，以前女朋友一定會笑番，不過今次……

「夠喇，你唔好再咁幼稚啦……」女朋友講完呢句，就攞起手袋，頭也不回直奔出餐廳……

今日係成雙成對嘅日子，只有單身狗先會屈埋喺屋企offline扮出街。

我望住對面張空櫈，咁我算係咩？

「先生，你份心形牛扒，邊位7成熟？」侍應行咗埋嚟。
「你攞景定贈興啊而家？」
「心形牛扒7成熟……」
「妖！」

今日係2月14日，情人節。時間係晚上9點18分……
尖東海旁。

「BB！你真係喺度啊BB！」我見到女朋友寂寞嘅背影坐咗喺尖東海旁。
「咦！你點知我喺度嘅？」女朋友說。
「你每次唔開心都會嚟呢度，話海風會將所有唔開心都吹走晒嘅～」
「你仲記得……」
「你講嘅說話，我每句都記得！」

「其實……頭先對唔住啊。我知係我唔啱，我唔應該嫌棄你，最衰都係Amy條八婆囉，佢話喺男友西裝褸袋，搵到佢男友偷偷哋買咗隻鑽石戒指俾佢啊！隻戒指仲……」

「你講嘅戒指……係咪呢隻？」我說。
「……」女朋友嚇到成個人呆咗。

「BB，我諗清楚㗎喇，你咁鍾意Amy男友，我專登帶佢嚟見你，我決定將呢份禮物送俾你。」
「……」
「Davy，我女朋友就交俾你喇～祝你哋幸福快樂。」

情侶間，不應拿別人的男友作比較。
最重要是，找個能哄你笑的伴侶。
祝單身狗，情人節快樂。

專頁：http://www.facebook.com/BlueGodZi ig：BlueGodZi