全因《大叔的愛》畀勇氣 夠膽同父母承認出櫃 港男：多謝阿田阿牧KK！網民：要一直幸福落去！ | 網絡熱話
廣告
「性小眾」話題被ViuTV熱播劇集《大叔的愛》帶動，成為最近港人熱話。雖然近年已經愈來愈多人接受同性戀，但「男男」同性戀依然經常被投以歧視目光，令一班男同性戀者缺乏勇氣面對自己。最近有一位男同性戀者，於討論區分享自己向父母承認出櫃過程，結局仲要出乎預料！原來一切都要歸功於《大叔的愛》？
撰文：Sumi｜圖片：網絡圖片｜來源：Dcard
勇敢於父母面前承認出櫃 港男：真心多謝《大叔的愛》！
男主角表示原本自己同啊田一樣，完全無諗過自己會鍾意男人。當發現自己對男人有feel嘅時候，真係勁無助，唔知點算好！之後第一次同男人拍拖，非常束手無策，仲好介意街外人嘅眼光。就算拍咗2年咁耐，都一直唔敢同身邊任何人坦白自己性取向。呢種無形壓力一直成為呢段感情嘅負擔，令男主角拍拖拍得好唔開心，好驚畀人發現自己「唔正常」。
而男主角都好心水清，明白到父母唔會接受自己係一個男同性戀者，亦知道大眾對Gay Couple存在好大嘅歧視，所有就算想坦白交代，都無機會可以講。直到ViuTV 熱播劇集《大叔的愛》上映後，男主角有感，港人似乎對「男男」同性戀不但非常接受，仲好支持一班「性小眾」勇敢做自己！所以感得呢個係好難得嘅機會，可以坦白承認同性戀一事⋯⋯
大結局乘機與男友十指緊扣父母爆笑問：咁你係田田定阿牧？
《大叔的愛》大結局當日，男主角特意約男朋友到屋企，同兩老一齊睇大結局。時機成熟時，男主角係父母面前拖起男朋友嘅手，十指緊扣。當大家都認定兩老一定極力反對時，佢地嘅反應好出乎預料地，展現出支持嘅態度！真係好感動啊！男主角都話，好驚訝兩老竟然無發火，仲同佢地傾訴，問佢地邊個係「田田」、邊個表白先。
男主角：終於可以光明正大拖住手出街 網民：要繼續幸幸福福！
男主角事後亦表達對男朋友嘅感激，好多謝男朋友一直以來嘅體諒，同埋肯畀時間佢，等佢願意坦白性取向時，先公開戀情。記者睇完，真係覺得勁Sweet啊！普通一對情侶能夠行到2年，經已唔容易，更何況係一對地下情嘅「男男」同性戀者呢？真係要經歷好多難過先可以行到呢一步！
其實無論係咩性取向都好，只要無傷害到任何人，就應該要勇敢企出嚟，做自己！希望一班「性小眾」睇完男主角分享之後，都可以勇敢做自己，勇敢面對世俗目光～支持你哋～
撰文：Sumi｜圖片：網絡圖片｜來源：Dcard
