中式點心嚟講，雖然燒賣同蝦餃相對受歡迎，不過講到鍾意食鮮竹卷嘅捧場客都唔少，貪佢清清地得嚟又唔會太寡，特別係外層嘅腐皮，口感軟綿綿，又有陣陣豆香，加埋裏面Juicy嘅餡料，一啖咬落去，即刻感受到多重滋味沖擊味蕾。所以話，識食就一定食鮮竹卷！

不過香港人咁繁忙，飲餐茶都趕頭趕命咁，想舒舒服服嘆個點心？咁不妨試吓7-Eleven嘅自家品牌7-SIGNATURE新推出嘅鮮竹卷，事關佢係百份百人手製造，味道同賣相一啲都唔差，而且最緊要係夠晒方便！只須用家用微波爐叮40秒就食得，如果用7-Eleven專用嘅微波爐，只需按2，叮20秒就食得啦，無論係屋企定夜晚餓餓地去便利店都一樣好快手就可以食到！

打開包裝，一盒有三條鮮竹卷，鮮竹卷用密封袋牢牢包好，夠晒安全衛生，唔怕一打開啲汁就飛到周圍都係，咁簡單嘅細節，已經睇得出用過心思。

鮮竹卷叮完之後，賣相都幾有驚喜，因為佢唔似其他叮叮食物一樣，叮完出嚟之後又燶又乾噌噌，而且仲見到少少蠔油汁keep住喺豆腐皮到，放喺隻碟到，唔講仲以為係酒樓出品嘅鮮竹卷，幾可亂真。

味道方面亦一啲都唔輸蝕。叮叮鮮竹卷不但有豐富嘅豬肉同蔬菜嘅餡料，外層嘅腐皮都一樣足料，粗略估計都有10層，咬落都感受到層次十足，而且餡料都非常入味，口感爽脆彈牙，裏面有豬肉、紅蘿蔔、木耳等等多種配料，真係估唔到便利店叮叮點心都可以做得咁精緻！

售點：全線7-Eleven

售價：$16

【便利店餓底】便利店燒賣大比拼 自家制蝦肉燒賣有驚喜

根據非正式統計，燒賣絕對係香港人最鍾意食嘅點心之一！雖然燒賣都分好多種，除咗地道嘅豬肉燒賣，仲有草根啲魚肉燒賣，而今次我哋就試吓最方便快捷嘅叮叮蝦肉燒賣，貪佢肉爽又夠鮮味。所以我哋就去便利店買咗三款常見叮叮蝦肉燒賣，由份量、賣相、味道、口感逐一評分，睇吓邊一款最好？

Round 1 : 外觀比拼

先嚟睇吓呢一款經常喺便利店都見到嘅燒賣A，一包有10粒，的確係三者之中份量最多，平均價錢都係最平，不過外型就相當細粒，而且賣相都好求其，燒賣皮隨意咁包住啲餡料，睇落似魚肉燒賣多啲，提唔起食慾。

呢款燒賣B，一打開就有6粒，比平時酒樓食嗰啲一盅四件，份量多少少，而最重要就係，燒賣喺香港製造。睇返成份，材料都相當豐富，叮完聞到有蝦肉香味，唔知味道會唔會令人有所驚喜呢？

而呢款燒賣C，份量係三者之中最少，得4粒咁多，而且平均價錢都係最貴。至於賣相都好正常，油味略重，肉眼觀察餡料睇落都算多嘅，唔知叮完出嚟會係點架呢？

Round 2: 味道比拼

燒賣A叮完出嚟好結實，而且外皮好易變乾，口感似食緊小石仔，無咩咬口，味道都只屬一般。

試吓燒賣B，只須用800W家用微波爐叮50秒就可以食得，十分之快手！叮完出嚟嘅燒賣層次分明，又唔會太乾，睇落都幾精緻，加埋紅蘿蔔碎碎特別賞心悅目。而且裏面嘅餡料雖然由四種肉混合成成，不過蝦味就相當突出，完全點出返蝦肉燒賣嘅精髓。而且入口煙韌，好有咬口。

而燒賣C叮完出嚟之後係無之前嗰款咁硬，不過睇落好油，如果以蝦肉燒賣而論，就有啲唔到題啦，事關食落去似食豬肉燒賣多過蝦肉燒賣咁，一啲蝦味都無，質地都有啲嚡。

所以今次便利店叮叮蝦肉燒賣比併，絕對係燒賣B —— 7-SIGNATURE 嘅蝦肉燒賣獲勝！

銷售點：全線7-Eleven

售價：蝦肉燒賣 $12/6粒

【便利店餓底】叉燒腸粉、雞絲粉卷、潮州粉果新嚟報到 7-Eleven自家品牌點心逐個試

上次記者就試完7-Eleven自家品牌7-SIGNATURE嘅翠玉餃，相當有驚喜，所以今次就試埋其他新推出嘅叉燒腸粉、雞絲粉卷同潮州粉果，一齊睇吓味道究竟係點？

首先試咗潮州粉果先，呢款潮州粉果如果用7-Eleven專用嘅微波爐，只需按3+1，叮40秒；而用800W家用微波爐嘅話，叮50秒就食得，1分鐘都唔使，夠晒方便。

拆開包裝袋，一盒有三隻粉果，份量同出面食嘅都差唔多。而且由於粉果皮好容易黏埋一舊，所以7-SIGNATURE好細心咁用膠兜將佢哋逐隻隔開，咁樣嘅話就算叮完之後，都唔會黐埋一齊、好難夾開。

登凳！叮完出嚟之後，發覺個粉果皮比起食開嘅叮叮系列，出奇地堅挺，冇出現倒塌、軟冧冧嘅情況，效果相當理想。

靚嘅潮州粉果重點就在於外皮要夠薄夠煙韌，餡料當然要夠豐富，花生和沙葛就絕對唔少得！切開粉果裏面一睇，呢款叮叮粉果都符合呢兩大要求，食落去粉皮好薄好煙韌，加上沙葛、韭菜等，口感爽脆，味道都唔錯，完全唔會因為係叮叮點心而有所遜色！

跟住就到雞絲粉卷，雞絲粉卷用7-Eleven專用嘅微波爐，按3+3，叮1分鐘，而用800W家用微波爐嘅話，叮1分40秒就食得啦，相比其他點心都係等多十幾秒，但點講都好，絕對叫簡單快捷。

打開包裝袋，都係一盒三條，份量都算幾足。外皮白雪雪，望落好薄，而裏面嘅餡料都見到脹卜卜，賣相睇落唔錯。

食雞絲粉卷當然要配豉油啦！雞絲粉卷叮完出嚟之後，外皮雖然變得比未叮之前薄，但就唔會又穿又爛。食落去外皮仲好嫩滑，值得一讚。

切開粉卷，可以見到餡料好豐富，有雞絲、木耳、磨菇等等材料，而且皮薄滑溜，用筷子一夾，都唔會話啲料散到一地都係。入口有香滑嘅雞肉，配口感爽脆嘅木耳絲，啖啖都好滿足，絕對係誠意之作！

最後食埋試埋新出嘅叉燒腸粉，佢嘅外形比起潮州粉果同雞絲粉卷都大份一啲，用7-Eleven專用嘅微波爐，按2+3，叮50秒，800W家用微波爐就用1分20秒就搞掂，用嚟做早餐就最好不過，份量啱啱好，食完唔太飽又唔會咁快餓，應該可以挨到去lunch。

打開入面，一盒都有兩條，睇落餡料遍佈嘅範圍都好平均，以咁嘅價錢嚟講，性價比高！

叉燒腸粉叮完出嚟之後，腸粉皮望落去滑溜晶瑩，賣相出色。靚嘅叉燒腸粉有兩大原則：首先皮唔可以穿，要有彈力，二就係叉燒唔可以硬實實，痴埋一舊。單睇外皮嚟講，呢款叉燒腸粉已經符合第一個要求。

至於叉燒餡料方面，都好細心切到指甲咁嘅大細，啖啖都係肉。用筷子輕輕夾開，都唔見叉燒好硬實實，配埋豉油蘸住嚟食，寧捨特別香口入味！

總括嚟講，呢三款叮叮點心，出嚟效果都好出色， 值得一讚係餡料切得細細，就算畀小朋友、老人家食都唔怕佢哋難咬。叮分幾鐘就食得，無論係便利店，定係屋企，想幾時食就食得，簡簡單單就已經好滋味！

銷售點：全線7-Eleven

售價：
潮州粉果 $12
雞絲粉卷 $16
叉燒腸粉 $16

【便利店餓底】想食點心幾時都得 7-Eleven翠玉餃率先開箱試食

7-Eleven嘅自家品牌7-SIGNATURE最近就新推出點心系列，分別有翠玉餃、叉燒腸粉、粉果、雞絲粉卷等等多款選擇，只要剪開包裝一角，再放入微波爐叮一叮就食得，既然係新產品，記者當然要首先即刻開箱試食新出嘅翠玉餃，睇吓佢有幾得先？

打開內包裝袋，一盒內有三隻翠玉餃，份量同平時酒樓見到嘅一盅三隻差唔多，不過等嘅時間就肯定短過喺酒樓食嘅好多，因為只要用7-Eleven嘅微波爐叮40秒就食得，夠晒方便快捷。如果想買返屋企或者公司，只要用800W的微波爐叮1分20秒就可以食得，做法咁簡單，用嚟當早餐或者宵夜都一流！

每隻翠玉餃外形都相當靚仔，唔會話因爲急凍嘢就扁晒，或者硬到石頭咁。叮完出嚟嘅翠玉餃，都唔見有縮水嘅狀況，而且外皮嘅皺摺都好分明，唔會變咗一嚿麵糰咁，以急凍嘢食嚟講，都算係高質！

翠玉餃餡料分別有豬肉、清水筍絲、紅蘿蔔、菇片等，一粒裡面塞到脹卜卜，材料都相當豐富！以$16呢個價錢睇，都叫交到功課，誠意十足。

試食完之後，呢款翠玉餃嘅優點係好快就食得，而且入口keep住熱辣辣，最啱趕時間又想飽肚嘅打工一族！而最值得一讚嘅係，翠玉餃個外皮做得好薄之餘，叮完之後又唔會乾爭爭。翠玉餃咬落去都好爽口，唔會食到軟腍腍一堆粉咁。豬肉餡料加上胡椒粉同芝麻油，夠香之餘，又少少辣辣地調味，相當過癮。

銷售點：全線7-Eleven
翠玉餃售價：$16