上山難落山更難| 4 項基本 落山要訣 @Fitz
廣告
我山雞喺呢度寫咁多篇文，講咗咁多嘢，全部係自己膚淺嘅經驗，我只希望藉呢個平台同各位行山友交流、切磋。大家千祈唔好當我係咩權威，呢個世代，資訊咁流通，大家亦懂得獨立思考，絕對唔會有咩權威。講完上一篇「婆仔上山法」，點都要講 落山要訣 ，避無可避。好嘞，將我所知盡講啦。我戴咁大個頭盔，一來出自肺腑，二來今次講嘅話題，其實我相當無信心。因為，我畏高，我怕落樓級，我怕跌，所以我更怕落山。
上山難落山更難| 4 項基本 落山要訣
落山要點（包括樓級、斜路、碎石路）：
1) 盡量將重心「坐低」，以免身體失平衡碌落山；
2) 雙腳微彎，有助降低重心，亦可以減少雙腳衝擊；
3) 上半身微微後傾；
4) 微微側身，左右腳可交叉而行。若落山時失平衡，因重心已「坐低」，所以只係屁股著地，損傷有限；（若太斜嘅碎石路，甚至可一邊手觸地）
嗱，上面四點其實只係好基本好基本好基本嘅心得，只係保護你落山嘅時候唔會一仆一碌，唔保證你行得快。落山最難掌握嘅問題，其實係因為要用比較少嘅體力，心態上希望可以加快速度。但其實落山（由樓級以至碎石路）需要比上山更多嘅耐性同專注，因為落山時踏錯一步，後果相當嚴重。
落山最重要嘅係「腳感」
打籃球有所謂「手感」（有手感嘅球員可以10射10中），咁落山嘅「腳感」呢？大致包含：對路徑嘅判斷、身體平衡嘅感覺、對自己能力嘅信任，甚至對每嚿石頭嘅判斷（嚿石會唔會鬆？）。上述種種，全部都要喺你落腳嗰一刻，全部作出決定。而呢個直覺，根本無得教，無得學，全部係由你自己一步一步操練所掌握得到。
補充一句，落石屎路有咩方法減少雙腳衝擊？我就會跑落山，長痛不如短痛，所以行山之餘，都應該間中練下跑。
講咁耐，咪怪我老套，行山始終無可避免都係計K數。K數夠嘅話，由雞公山衝落水浪窩，你都唔會腳震震囉。
