【假日好去處】231件阿富汗古文物@香港歷史博物館 極珍貴千年黃金、青銅及象牙雕刻品
又有文青好去處介紹啦！香港歷史博物館嘅「塵封璀璨－阿富汗古文物」展覽，繼歐、美、澳洲和國內等地展出後，第29站來到香港啦！今次展出231件珍貴展品來自阿富汗國家博物館嘅珍藏，全部於阿富汗境內4個著名考古地點出土，包括法羅爾丘地、阿伊哈努姆、蒂拉丘地（黃金之丘）同貝格拉姆。當中有金器、玻璃器、青銅及象牙雕刻品，全部屬於青銅時代至公元一世紀期間嘅珍品。
不但有珍貴又手工細緻展品欣賞，今次展覽仲加深咗大家對古阿富汗同周邊地區嘅文明發展及文化嘅認識。如果對古希臘、古印度同古羅馬等文化有興趣，就要更加深入了解阿富汗於呢段時間如何受以上外來文化影響，仲印證古阿富汗於絲綢之路上扮演十分重要嘅角色，促進咗世界文明交流，從今次展覽必定會令大家大開眼界，擴闊視野！立即重點推介有咩瑰寶必睇！
歷史最悠遠
公牛紋金碗殘片（公元前2200年至前1900年，黃金）
黃金製成嘅金碗上有兩隻公牛紋飾，屬於常見嘅兩河流域圖案，同其他出土自法羅爾丘地嘅金銀器一樣，發現時都係已被切開瓜分。
最華麗珍貴
黃金王冠 （公元 25 至 50 年）
整個王冠手工精細而且工藝超卓，用黃金同綠松石製成，雖然綠松石已剝落，但仍然清楚睇到王冠上樹木狀組裝為分拆式設計，方便攜帶，距離至今大約2千年歷史，令人驚歎當年工匠嘅非凡手藝。
最顏色豐富
彩繪玻璃杯 （公元1世紀）
玻璃杯顏色極為豐富，杯身畫有男女分工合作拾椰棗嘅畫面，色彩保存良好，就如當代作品一樣矚目。
最趣怪可愛
玻璃魚 （公元1世）
當時古阿富汗人用吹製玻璃技術製成，獨特之處係魚身用扭曲咗玻璃條製成，造型搞鬼得意。估計原來係用來盛載精油或油膏嘅容器。
最勇武均稱
勇士圖案鉤扣 （公元 25 至 50）
以黃金打造而成，雕功極精細，圖案設計精美。有傳飾品內勇士其實係亞歷山大大帝添！
最名貴精石
君主與龍吊飾 （公元 25 至 50 年）
正中心君主立象同守護兩旁神龍，整個構圖好有氣勢啊！結合咗黃金、綠松石、石榴石、青金石、紅玉髓同珍珠打造而成，富有兩河流域同伊朗高原風格。
最富宗教意識
佛教《本生經》故事象牙雕板 （公元一世紀）
用象牙雕刻而成，十分珍貴，當中有佛教《本生經‧糠腹辛頭馬本生譚》嘅故事，反映當時宗教信仰。
最多元文化
西布莉圖案飾板 （公元前三世紀）
印證咗當年嘅銀質鍍金技巧已十分成熟，更呈現了多元文化嘅融合，當中包括希臘、西亞嘅阿契美尼德王朝，以至古代小亞細亞嘅風格元素。
體驗體驗古阿富汗文化專區
欣賞珍貴展品之餘，去到「體驗古阿富汗古文化」區，仲可以「化身遊牧民族」親身感受民風；又可以去「文化動畫廊」深入了解古文物故事；又或者去「金沙尋礦」嘗試沙下尋寶，認識文物上礦物同寶石。而鍾意設計同畫圖嘅人士就可以到「公主･勇士大變身」區域，為公主或勇士印上展品圖案，發揮創意。有得睇，有得玩，仲可以對古文化加深認識，大家又點可以錯過呢！
詳情：
「塵封璀璨－阿富汗古文物」展
展出地點：香港歷史博物館（尖沙咀漆咸道南100號）
展覽期：即日起至2020年2月10日
開放時間：10am-6pm（平日）
10am-7pm（周末及公眾假期）
10am-5pm（聖誕前夕及農曆大除夕）
星期二（公眾假期除外）、農曆年初一及二休館
入場費：$10（標準）、$5（全日制學生/殘疾人士及一名同行照料者/高齡人士）、博物館通行證持有人免費入場。
