「刷單賺佣」求職騙案手法多多 見到「筍工」要Say No！
最近電話成日收到好多招聘SMS及社交媒體廣告，強調零經驗、在家工作都可以有高薪厚職，其實點會有咁多筍工先得㗎？呢啲都係求職騙案，目的係呃你墊支金錢！
今年1至4月，警方接到758宗「刷單賺佣」求職騙案，受害人合共損失接近9千萬港幣。今年首4個月嘅案件宗數已經佔去年全年案件宗數嘅百份之87。疫情之下，各行各業都好難搵工，但千祈唔好見到「筍工」就樁個頭埋去，最後盞得不償失！
網上求職騙案手法多多
騙徒通常會喺社交媒體落廣告，假裝聘請「跟單員」、「線上行政助理」、「點評員」、「手工活」、「電影推廣員」等，聲稱協助商家「提高銷量」、「提升數據流量」、「提高瀏覽熱度」等。騙徒要求有興趣者經社交媒體進行面試。面試嗰陣，騙徒講工作性質只需受害人到指定網店將商品加入購物車然後傳送截圖，或者上指定網上平台為帳號充值或做其他任務。受害人最後要墊支到指定個人銀行賬戶。騙徒訛稱受害人之後可連本帶佣一次過拎返！
頭幾次都會刻意佈局好快連本帶佣過返錢俾受害人，等佢信以為真係咁筍咁易賺快錢，一旦取得信任，就會誘導佢作更大額購物同墊支更多金錢，隨時呃走受害人幾十萬，跟住人就消失埋，最後俾人呃左都唔知係邊個做！
所以有懷疑，記得立即致電「防騙易18222」熱線查詢，唔好俾人呃呀！
詳情： https://www.adcc.gov.hk/zh-hk/anti-deception-month.html
(Presented by 反詐騙協調中心)
