第一次 求婚失敗 ，真係可以唔分手求第二次？ @藍橘子

佢同拍拖三年嘅女朋友去日本旅行，阿耀非常寵愛女朋友。因此佢打算今次旅行秘密求婚，仲偷偷買下大大粒鑽戒，女朋友着住漂亮日本和服，再配合大阪京都迷人美景，諗住今次一定得米。

點知，佢失敗咗……
女朋友答咗一個好老套嘅答案：「未Ready。」

由於阿耀諗住自己一定成功，所以Plan好行程第一日就去京都，點知 求婚失敗 ，搞到成個大阪旅程同女朋友都面左左。

其實阿耀有暗示過想結婚，因為屋企人年紀大，想氹下父母開心。
但女方一方面唔想將自己終生幸福用嚟氹人哋嘅父母。
更重要嘅係，女方根本唔想嫁畀阿耀。雖然兩個人係好開心，佢亦鍾意阿耀，但未鍾意到要嫁畀佢……

以上呢個血淋淋嘅真相，係「事後」女方自己講出嚟。

點解叫事後？！
因為到第三日，阿耀終於頂唔順，畀錢買多張機票，自己搭飛機返香港。

情侶鬧交可以扮無事，只要花時間，沉住道氣慢慢氹，一定可以和好。

但求婚失敗，自知短期內無法改變，亦無可能氹到對方戴上戒指。

鬧交可以用買嘢嚟氹。
但求婚鑽戒，已經係拍拖購物清單中最終極嘅項目，女仔唔收隻戒指，你仲可以買啲乜令佢回心轉意？

阿耀自己一個返咗香港，佢女朋友去完成個旅程之後，都無再搵阿耀，只係Send咗呢個滿載真相嘅訊息畀佢。

呢個故事嘅結局，係因為求婚失敗，而導致分手收場。
電視劇世界，有101次求婚。
現實世界呢？會唔會有第2次求婚嘅機會？

一個男人被拒絕之後，每日要面對住一個拒絕你嘅人，當無事發生繼續拍拖，相信好少人做得到。

另一方面，求婚失敗意味着對伴侶唔了解，連對方有冇同你結婚打算都未清楚，當求婚係一件五五波嘅賭博。就算求婚成功，之後兩個人嘅日子，都未必幸福。

延伸閱讀