東京必必必食!!! RINGO 人氣蘋果批「一人限買4個」

May 14 2016

有咩自暴自棄得過响池袋街頭吸足成個鐘廢氣都唔死心誓要買到一人限買4個的蘋果批？賣開人氣半溶芝士撻嘅BAKE，今次唔賣芝士改行賣蘋果批，一樣吸引饕客無懼風雨大排長龍！新開的蘋果批專門店 RINGO 位於池袋PARCO 旁，所有蘋果批在店內即製即燒。

RINGO 蘋果批每個 ¥399/HK$28

經過七次反覆改良的蘋果批，特別挑選清甜爽口的蘋果切成粒狀，外層的鬆脆的批皮是用北海道牛油及小麥粉做成，以意大利特製的焗爐烤焗至半熟，才加入新鮮打成充滿雲呢嗱香的吉士忌廉再焗，工序丁點也不簡單。新鮮出爐的蘋果批，咬下，批底瞬間粉碎，中間帶有微微玉桂香的蘋果清甜多汁，難得食完一個仲想 encore，排咗咁耐隊，獨食唔分享是常識吧？