【日本人氣偶像訪港】（更新！記招問答全紀錄）Hey! Say! JUMP再度訪港 成員話想演《海綿寶寶》漫改?!
撰文：Carmen｜圖片來源：GEM TV、網絡
Q：Hey! Say! JUMP上次訪港有冇留下特別回憶？
藪：2012年嚟香港開演唱會時，同到成龍見面、握手、合照，覺得好開心！好激動！
高木：最難忘嘅係演唱會時，Fans準備咗surprise畀我哋，喺演唱會上用日文唱咗我哋首star time，真係好難忘、好感動。
Q：首次參與《THE MUSIC DAY》海外演出嘅心情係點？
山田：雖然每年都有參與呢個節目嘅演出，但只喺日本國內表演過。今次可以嚟到海外演出，希望可以畀世界中更多人睇到我哋嘅表演。心情雖然有啲緊張，但同時都非常期待！
有岡：因為今次演出會以香港非常著名嘅「百萬夜景」作為舞台及背景，所以非常期待。
Q：今次再嚟到香港，有冇啲地方係好想去，又或者有冇嘢係好想食嘅呢？
中島：西瓜！西瓜好食！（用廣東話講）（記者案：反應超快！超雀躍！）
大會事前已經準備咗西瓜汁畀各位成員試飲，藪表示相當開心！大會主持教JUMP用廣東話講「乾杯！」。成員試飲後都好積極問「おいしい（好飲）」廣東話點講，大家心情都超好呀！
Q：今次仲會舉行粉絲見面會，有冇學定啲廣東話？又有冇啲好想學嘅廣東話？
藪話學咗嘅廣東話已經喺自我介紹到用哂。而八乙女就開始咗一人小劇場，扮打電話，然後講咗句「喺邊度？」HSJ嘅大家邊笑，邊用廣東話講「冇問題！」。有岡就突然好大聲咁講咗句「搞咩呀！」，當成員都喺度笑時，記者們都開始懷疑自己係咪聽錯，問返有岡呢句係咩意思時，有岡就話「助けて⋯（救我）」，原來，佢係想講「救命呀！」。（笑）
高木就問有咩係帶有好嘅意思嘅廣東話可以學，藪就問例如香港嘅流行語之類嘅說話，主持人就教JUMP講「做人唔好hea！」，呢句說話由一班咁閃耀嘅偶像講出嚟特別有喜感呀！
講到成員學咗咩關於食物嘅廣東話，八乙女就話「チャーハンパオ（炒飯包）」，解釋後先知原來佢係想講「叉燒包」！中島就話「燕窩蛋撻」。大家原來都識幾多香港食物嘅廣東話發音，唔知去飲茶時係咪已經可以自己落order呢？山田即刻笑住話，可樂嘅話都應該order到嘅。
Q：往年係HSJ出道10周年，喺呢10年裡面，你冇你哋印象好深刻，認為係最好嘅表演呢？
藪：舊年10周年舉行咗盛大嘅慶祝，收到大家嚟自各方面嘅祝福，渡過咗非常美好又難忘嘅一年。
Q：未來有咩發展計劃、目標呢？
中島：難得嚟到香港，如果可以嘅話，果然好想再舉辦一次亞洲巡迴演唱會！
Q：岡本圭人9月份將去到美國留學，而演唱會將以8人形式舉行。相信好多fans都想知道，今次呢個表演會唔會係岡本留學前最後嘅全員演出呢？
藪：年內嘅話今次並唔係最後一次齊人演出，但如果係以香港嚟講嘅話就係最後啦。
Q：成員大家對於圭人要去海外留學一事，依家係咩心境嘅呢？
岡本：嚟緊去留學嘅目的係想增強自己嘅才能，突然嘅發表相信都令到唔少fans覺得困惑、不安，但希望各位可以支持我呢個，為我自己今後嘅人生而做嘅決定。我不但會掛住我嘅成員，亦都非常掛住我嘅fans。Once again, I miss you and I love you.
藪：圭人希望去留學令自己可以有所成長嘅意願之強烈，有好好咁傳達到我哋心裡。我自己都非常希望圭人可以有所成長，然後再回到HSJ裡。為咗可以挺起胸膛迎接圭人歸隊，我哋都唔會停下腳步，希望JUMP可以有更大嘅成長。
知念：雖然會有一段長時間會以8人形式活動，但希望即使只有8人嘅JUMP，都能夠有比現時更活躍嘅表現，令組合得以成長。等圭人返到嚟就可以向大家呈現更壯大嘅HSJ。我哋8個人，首先以日本中嘅活動為先，不得不更加努力呢。
中島：頭先圭人都有用英文講過，今次咁突然嘅發表相信令好多fans都感到不安。但無論如何，希望大家都能夠支持8人嘅HSJ同埋圭人。
伊野尾：無論係香港嘅fans又好，圭人嘅fans都好，或許呢次發表會令大家有好寂寞嘅回憶，但我相信由美國學成歸來嘅岡本圭人，能夠成為活躍於世界嘅岡本圭人。，希望大家都能好好期待住圭人歸隊。希望香港嘅fans都能夠支持岡本圭人，以及8人嘅HSJ。
有岡：相信今次美國留學對圭人嚟講係一件好事，為咗唔會喺圭人歸來時被話「乜你哋仲係得呢個level咋」、被成長咗嘅圭人睇小，8人嘅HSJ都會非常努力將組合壯大起嚟。
八乙女：我認為去美國留學呢件事，喺HSJ嚟講，係只有識英文嘅圭人先能夠有嘅經驗，果然希望可以全力地推動圭人繼續前進。
山田：一路以來都係以9人組合形式一齊走過來，圭人依家要自己一個離開HSJ去重新審視自己。對圭人嚟講，我希望呢段日子會成為一段好嘅時光。而留喺日本嘅我哋8個人，都希望一邊見證圭人嘅成長，一邊令我哋自己都更加進步，重新審視一下自己，好好咁運用呢段日子。所以我哋都希望fans們可以用溫暖嘅目光繼續守護HSJ。
Q：今次為咗《THE MUSIC DAY》遠道來到香港演出，唔知有冇咩特別嘅準備畀我哋香港嘅觀眾呢？
有岡：因為今次會用香港嘅夜景做背景，果然要不輸呢副景色，用上美麗嘅外貌配合演出，所以事前做咗好多護膚！（HSJ全員爆笑）
山田：除咗護膚之外，今次表演會帶來好多未喺香港表演過嘅歌。而且今次可以畀世界更多地方嘅人睇到我哋嘅演出，我哋作為日本嘅海外代表，帶住唔令日本蒙羞嘅、喺日本進行過多次綵排嘅表演嚟到演出，希望大家都能有所期待，好好欣賞。
Q：當年Asia Tour HSJ曾經用廣東話演唱過”Thank you~僕たちから君へ~”，用外語演唱自己嘅歌時成員感覺到有咩難度呢？
中島：因為旋律唔同咗，所以好難唱。（高木：係啊～）
高木：但我哋演唱時，fans都有同我哋一齊唱，果然有種一體感啊！
Q：對JUMP嚟講，記外語嘅最好方法係咩呢？
中島：總之就一路猛咁講！又或者寫係手上提自己（笑）
山田：記語言嘅話可能用歌嘅方式記會更容易，有埋旋律幫手，一邊哼住一邊記好似會更易記得。
Q：今後如果係香港或者海外演出時，又會唔會有將廣東話放落歌曲裡嘅計劃／想法？
有岡：嗯⋯雖然唔會係全首，但都有可能會喺曲中部分地方加插廣東話，請大家好好期待！
山田：打招呼時會嘅，但依家嚟講⋯⋯加廣東話對我哋而言有啲難度！
Q：師兄關8最近去到台灣宣傳9月嘅演唱會，Johnny’s都已經好耐冇喺亞洲開過演唱會喇，咁唔知HSJ會唔會有計劃再嚟香港開演唱會呢？
山田：雖然目前仲未有相關嘅計劃，但我哋自己嚟講都好希望再喺亞洲各地、香港開演唱會。今次再嚟香港見到有咁多fans等緊我哋，為咗回應大家長久嘅等待，我哋都好希望可以再嚟舉辦演唱會。
Q：如果再有機會舉辦亞巡、甚至係世巡，會唔會有啲特別表演呈現畀海外嘅fans呢？
知念：果然會想為fans帶來有日本風味、傳統嘅表演，甚至同當地嘅文化結合，呈現不一樣嘅HSJ。
藪：想將歌曲換成用各國語言演唱嘅歌。因為有各國嘅fans都等緊我哋，如果能透過用當地語言嚟演唱歌曲嘅話，相信fans都會好開心。
Q：如果可以畀成員自己選擇，希望喺香港邊個地方表演呢？
有岡：我想喺有好多銅像嘅星光大道表演！
山田：因為我哋對香港嘅了解唔多，反而希望大家可以推薦一啲勝地畀我哋呢！
藪：Monster Mansion！（記者案：鰂魚涌益昌大廈，日本勁紅嘅香港觀光熱點！）
同場有他報記者向HSJ推薦去旺角表演，當翻譯向JUMP介紹旺角時，全員都覺得好有興趣，話可以考慮一下。
Q：聽日就係七夕（7月7日），成員大家有冇咩願望呢？
藪：果然全員都希望嘅，就係再開亞巡呢！
高木：七夕啊～希望牛郎同織女可以成功見面啦（中島：好可愛！）但聽日我哋就能(同fans)相遇啦！（記者案：果然係偶像！）
Q：日本中有咩地方/美食可以推介畀其他亞洲嘅朋友？
有岡：有時好似遊客比我哋更加清楚啊！
高木：都有試過被推介返轉頭嘅情況呢～
中島：但香港嘅話，茶好似好出名？例如好似京都咁抹茶非常出名！
Q：請成員各自挑選一位成員，講下對方有咩優點/好處？
（記者案：由於當時大家都好困惑應該揀邊個member，於是就按坐位順序嚟講啦。）
伊野尾→知念：首先，我身旁嘅知念，正如大家所見一樣，好可愛！但知念唔單止只有可愛，脫衣後意外地係肌肉型。咁呢啲肌肉係有咩用呢？就係用嚟表演後空翻，大家睇到知念嘅後空翻相信都會嚇一跳，呢啲就係知念嘅魅力啦。
知念→山田：請大家睇睇，（中島：大家要按呢個形式嚟present嗎！）呢張臉係咪好靚呢！就只係呢一張臉，已經令日本嘅女性神魂顛倒。除此之外，亦有好好嘅領導才能，有能夠帶領我哋成個組合嘅強大能力。果然，又靚、又強、又帥氣，呢個人就係山田涼介！
山田→有岡：嗯～頭先好努力咁思考，發現都係一個(優點)都冇！（笑）大貴呢，係擁有不被任何人討厭嘅被愛能力，我相信唔止係香港，世界各地都會一樣喜歡呢個人呢，呢種被愛角色係佢最大嘅優點。除此之外，喺演唱會上亦會表演DJ、rap等等，係個擁有好多技能嘅人，希望大家都能睇到佢呢方面嘅反差魅力。
有岡→八乙女：喺HSJ裡面係個活躍氣氛嘅人，有啲喜感嘅。除咗live上嘅表演，亦好鐘意表演顏藝、模仿，會展現多種唔用嘅面孔。雖然平時都好可靠能幹，但偶爾會展現天然、鬆懈嘅一面，呢啲都係佢嘅一種魅力。
八乙女→中島：裕翔喺JUMP裡面係身高好高、擁有模特兒體型，能夠被潮流穿著（中島：啊..被穿了、眾人大笑）著衫好型，呢方面果然好有魅力。另外我哋團內有組樂隊，裕翔擔任最重要嘅鼓手，我認為呢種反差非常之有魅力。
中島→岡本：圭人係Johnny’s裡面較為少數嘅bilingal，能夠好似咁樣進行世界性嘅活動，令我覺得好自豪同尊敬。嘛⋯雖然即將要去留學，但更期待圭人去更加磨練自己嘅語學能力。最近亦都開始逐漸教我英文，果然好溫柔啊圭人！喺噚晚嘅飛機上，我哋一齊坐，我當時睇緊書，但飛機內嘅燈光咪會熄嘅，然後我就搞不清個燈掣係邊（HSJ大笑），圭人就話咗我知係邊，雖然係件小事但真係好溫柔啊！
岡本→高木：正在閱讀呢篇記事嘅各位，請想像一下，如果呢個世上會有位冷酷嘅、身型好嘅、有性感聲線嘅男人，大家認為點？（山田：不會有吧～）竟然，JUMP裡面就正正有個咁嘅人！高木雄也！敬請對佢Check It Out！（HSJ大笑）
高木→藪：雖然我哋係同年，但藪係團內最年長嘅，為人非常可靠，有啲咩事都願意聽我傾訴、商量，以好寬廣嘅心去接納我、聆聽我嘅聲音，會喺聽完我嘅說話再畀意見我，呢方面令我覺得非常可靠同信賴。
藪→伊野尾：我覺得伊野尾係個有多種面孔嘅人，平時就好似依家咁鐘意胡鬧，發言又亂咁嚟，但喺日本裡面，佢係一個偏差值高，喺名牌大學建築系畢業嘅人，擁有建築師資格（伊野尾：沒有去考資格⋯）啊⋯沒有啊（笑）（HSJ全員爆笑）
Q：喺海外出外景同日本國內出外景有冇唔同嘅地方？
有岡：航拍機好勁！有好多部不停飛來飛去，好厲害！
山田：日本內拍攝就好少會遇到fans，但海外就神奇地周不時會遇到fans。而且各地工作方式、文化都唔同，果然會有少少唔習慣呢。
Q：會唔會約埋一齊去美國探岡本圭人？
眾人：夾到時間嘅話想去呀！
山田：雖然係會想探圭人嘅，但我更多只係單純地好想去紐約（笑）
Q：成員伊野尾慧剛剛過咗生日，成員有冇特別嘅慶祝活動呢？
伊野尾：喺工作地方大家都同我慶祝咗生日，而且大貴送咗《復仇者聯盟》嘅角色模型畀我！
Q：山田同有岡以前嚟過香港一段時間拍攝《金田一》，當時有冇啲特別回憶呢？
山田：其實都只係逗留咗一星期左右，冇咩時間去觀光，一直都忙住拍攝。只記得拍連續劇嘅間隔時，拍攝咗綜藝，食過鴨掌、田雞、蟲等等珍奇嘅食物，同埋坐過雙層巴士。
Q：要拍漫改電影嘅話成員們竟然係想拍⋯⋯?!
漫改電影一直都好受歡迎，JUMP成員山田涼介舊年就拍咗殿堂級漫畫改編作品，《鋼之鍊金術師》嘅真人版電影，其他成員又有咩漫改電影想拍呢？
成員伊野尾慧就話：「知念好似可以拍多啦A夢喎！」引來Hey! Say! JUMP全員爆笑，仲話知念嘅戲路好闊添呀！
如果係拍美國漫改，成員又會點揀呢？有岡大貴立即就話：「阿森一族？」成員就附和話染黃個頭就可以完美演繹《阿森一族》啦！Fans們快啲助有岡拎到出演機會啦！
中島裕翔就話知念侑李可以挑戰一下拍《海綿寶寶》，而中島自己就可以做「Kenny the cat」嘅角色。大家陸續發揮無限想像力，藪宏太表示可以試下拍《史奴比》，咁岡本圭人就可以演「查理布朗」個角色啦！成員各位想挑戰嘅角色會唔會太高難度！（笑）
睇完Hey! Say! JUMP咁可愛嘅發言，係咪好想睇到佢哋喺香港嘅演出呢！咁就記得鎖定聽日，7月7日now tv 151台由GEM TV直播嘅THE MUSIC DAY音樂節目啦！
