$628 飛東京香草之坐後報告 @ Travel 佳

Travel佳成日同大家講，去旅行嘅第一宗旨就係smart spending，出去玩唔一定要豪玩，但一定要使得精明，所以LCC（Low Cost Carrier）對Travel佳嚟講一樣係個好選擇，只要時間靚、服務好、物超所值，Travel佳一樣會推介。

早幾日同朋友新年小聚，講起去日本旅行，大家都認為雖然日圓6算好抵，但機票價錢就長期高企，想平玩日本，特別係去東京掃貨，LCC的確係一個最好嘅選擇。而Travel佳啱啱年尾就試咗之前買落$628單程飛東京嘅香草航空，究竟整體嘅感覺係點？立即同大家「些牙」！

Checkpoint 1 舒舒服服凌晨去晚返

放得假去日本旅行，當然想玩足咁多日，早去晚返最實際！

不過，如果細心比較下其他航空公司嘅來回香港同東京嘅航班，無論係飛成田定羽田，一係就朝早5點落地，連公共交通都欠奉，一係早機出發去到當地都中午，特別係冬天出得市區都接近天黑，實在好掃興！最慘係回程嘅時間，一係就半夜起飛，要喺街上足足流連一日等上機，三更先返到香港，一係就要你下晝3點幾就喺新宿搭車去機場，前後計落足足冇咗一日又辛苦，去旅行點解要咁陰功先？

反觀今次坐香草航空，日日都有2班機出發，有凌晨同下晝機揀，班淩晨機去程出發係02:00，去到東京成田係07:05，返到新宿嘅酒店大約係早上10點，歎過早餐即可出發去掃貨！回程時間係20:40，啱啱入黑6點幾先出發去機場，返到香港都係01:00，點都好過朝早落機唔知瞓唔瞓好啦！

Checkpoint 2 改票冇難度

坐LCC最驚係乜？當然係改票同行李問題！想慳啲budget去掃貨，所以先一早訂機票啫！但如果真係有事去唔到，好多人都擔心全數機票錢就此作廢。

不過，香草航空就有唔同嘅票價類型，分為原味香草Simple、繽紛香草Inclusive以及心動香草Campaign。原味香草Simple程新一季價格由$648起，包咗10kg嘅手提行李，最重要係只要俾每段$305同差價就可以更改航班同日期，就算一早訂好機票，有改動時都唔會蝕啦！

更甚者係，如果購買$918起嘅繽紛香草Inclusive，更包埋20kg嘅寄艙行李，並可以預選座位，而更改航班更只需每段$40同差價，更可以辦理退票，絕對夠晒flexibility啦！

Checkpoint 3 日式機上服務

坐LCC就冇啖好食？相信大家對日式嘅服務水準都有番咁上下信心吧！香草航空係ANA全資子公司，日本公司，日本質素，空中服務員當然禮貌十足。而更令Travel佳有驚喜嘅係特別嘅餐飲，重點推介香草航空特製陽光奶油麵包，入面係滿滿嘅奶油忌廉，實在同食開硬繃繃嘅飛機麵包完全唔同。

另外，機上仲有氣球牛奶布甸供應，呢隻牛奶布丁係用咗成田夢牧場嘅牛奶作為原料，再包喺一個氣球入面，只要用牙籤一篤就會爆開，感受到濃厚嘅奶味同滑嘟嘟嘅布甸，絕對係一個飛行中嘅樂趣！兩款美食都不過係350yen，計落只係港紙$22.8咋！

Checkpoint 4 買航空公司手信

唔講你唔知，其實Travel佳我係一個標準嘅飛行迷，好鍾意收集唔同航空公司出品嘅紀念品，喺成田機場T3 food court嘅旁邊，有一間稱為V Store嘅舖頭，入面有林林總總你估唔到嘅香草航空紀念品出售，Travel佳就特別推介一啲memo、貼紙同香草熊仔，醒目嘅藍黃色真係見到都令人開心！

講到尾，有飛先最實際，如果一票難求嘅話又點去先？Travel佳就check過，佢哋啱啱推出嘅2016年夏季票價，適合3月27日至10月29日出發，單程最平$648起，仲有大量嘅機位，4月櫻花季同8月尾暑期旺季仲有唔少日子可以訂到$648嘅機票，計落都係$1,561來回連稅*，想4K平遊東京？實在冇難度啦！快啲手喇喂！

香草航空官網：www.vanilla-air.com/hk
香草航空facebook: Vanilla Air Hong Kong

*價格截至8/1