x，香港人嚟既！@貪玩空少安德魯

仔：「呀媽，個邊有香印青提買呀！」
媽：「係播呀仔，快d過去試下。」
呢個時間，大阪黑門市場既街頭上有好多個頭同時間望住呢家人，
大家雖然無出聲，但肯肯定心裡都有句OS，「喂_，香港人嚟既。」

撰文/FB：貪玩空少安德魯圖片：新傳媒資料庫

香港人去旅行，最鐘意就扮大支野，
明明平時翻工就鵪鶉咁款，
可能以為俾左錢就做皇帝，由上機個刻，
就覺得自己係一個有錢人，
係你有錢好把閉，但請麻煩有品。

香港人最叻就係唔執輸，
行要行最快，野飲要拎最多，野食都要兩個。
個d upgrade客，好似前世無飲過cappuccino同綠茶，
杯杯都打孖黎飲，拎住個menu，
唔識讀個英文字，就 ” I want this one this one and this one”，
可以勁厚顏無恥咁大聲話，
男：「我要試哂menu上所有飲品！」
講真，你有咁多把口咩？

識兩句英文既，第一句一定係「One more?!」
我肯肯定見過有個男人，一開波就要兩個餐，
仲要打包埋人地拎來飲果汁既膠杯仔，
男：「老婆呀，呢隻杯真係好好嫁，拎多幾隻落左機有得用。」
都係個句，只要唔執輸就可以，
飲要飲到盡，食要食到盡，拎都要拎到盡。
男：「仲有呀，大家記住食啲杯麵呀，真係好好好好好食嫁！」

其實，你前世無食過杯麵嗎？

以為落左地，可以俾我抖下，
_，又係香港人。

其實，好容易就睇得出，邊個係香港人，
去日本呢，就係個啲著住對New Balance，
背住個牛龜咁大既Nike爬山背囊，
然後拎住啲野食，一路行一路食，

十居其九都係香港人，香港人掃慣街麻。
如果個個人係條街大大聲講野，
肯肯定個個一定係香港人。