百合之濱玻璃水天堂記者搶灘實錄

Nov 17 2016

近年去日本，總會有一種莫名的失落感，眼前的好山好水好風光，因為過度的觀光開發，令人覺得傳統味道正在一點一點的消失。記者為了出發找尋原汁原味的日本原風景，今次出發去鹿兒島玩跳島，決定出興論見見傳說中期間限定的純白沙州「百合之濱」！日日凌晨4點起身坐貨船、搭內陸機，究竟值唔值得？百合之濱又係唔係好似網上熱傳咁靚？即刻睇睇啦！

採訪：Alex @ A君的泡菜日誌 | 圖片：Scott

Q1| 百合之濱喺邊？

百合之濱位於與論島大金久海岸對出約1.5公里，要坐艇仔才能搶灘，但每個月只會在潮退時快閃現身，標誌性的波浪紋純白沙洲，即使查好日子出發，都要靠運氣才有機會看到。由於網上熱傳，帶挈來回百合之濱的觀光船航班已大大增加，可惜連經驗豐富的船家都未能準確預測沙洲露出探頭時段，個個只敢保證玻璃水任睇，所以要親眼見到天堂秘境真的可遇不可求，難怪愈難愈愛，人人慕名而來。

Q2| 搶灘辛苦嗎？

其實唔算，不過要好早起身，因為的是追趕黃金2小時退潮時間！首先去大金久海岸，轉乘當地船家的小艇，當日記者就坐「幸福丸」出發，沿途湛藍海水碧波蕩漾，海天一色靚景已令人期待天堂國度的夢幻畫面。短短10分鐘，突然看到海底有一層薄薄白沙，我就知：「到埗了！」落船時水位只及膝，走兩步話咁易上岸，完全唔辛苦！

Q3| 沙洲上有咩玩？

尤於是淺灘，所以無得玩浮潛，不過見到腳下閃到反光的玻璃水，當然不能錯過影閃卡機會，沙洲上隨處可見情侶放閃、小孩嬉水，甚至有人玩香蕉船！而且百合之濱有個傳說，因為沙洲中藏有獨特的星沙，雖然是孔蟲的外殼化石，但形狀夢幻人人想要，而傳說話只要找到與歲數相當的星沙，就可以獲得幸福！難怪沙洲上人人都「𠌥低身」尋寶啦！