燈泡識唱歌?! 日本Top 5熱搶美容家電 |日本旅遊|

Feb 29 2016

去年年度流行語爆買（Bakugai），似乎來到2016仍然繼續流行。近日日圓走勢波動，匯率似過山車般又升又跌，叫我等shopping精每日心情忐忑不安。日圓雖然有反彈趨勢，不過5月開始將實施全新消費稅制，￥5000已可退稅，唔使再分耗品及一般商品。潮物藥妝買過，今次主攻實用電器及家品，分析日本熱話家電神器「值托率」，推介當今最值得千里迢迢托返香港的生活小道具，趁新年剛逗完利是錢，早買早享受，遲買唔止貴幾嚿㗎喇！

很想要吧？最恨Top 5！

只要在東京走入BIC Camera、Yodobashi行一轉，放眼盡是最新廚房家電、實用美容電器、最潮生活用品，相信人人都會雙眼發光，好想買哂返屋企！「日本設計」魅力實在難以抵抗，今次專誠走訪各大電器鋪，嚴選5大最人氣家電，真心恨要！

No. 1 BALMUDA多士焗爐

日本價：￥22,900/HK$1,577（蔦屋家電）
值托率：★★★★★

紅爆日台！金黃烤多士神器
今時今日一個爐講求多功能，烤焗燜炸一物多用才是王道，偏偏這一部BALMUDA TheToaster 卻一反常態，只能用作烘熱多士及麵包，聲稱能做到美味得令人感動的麵包。這部曾獲2015 Good Design Award 金獎、2016年德國iF 設計大獎的多士爐，即使索價過千元，依然長期熱賣，更被台灣熱捧為「超神奇烤多士神器」大舉托回家鄉，值托率甚高。
捨棄日本家電常見的五顏六色，以簡約低調的無印風外形配黑白灰示人。操作原始，只選模式時間即可，最大特點是頂部設加水位，倒入5毫升清水，烘焗過程中散發水蒸氣為麵包保濕，製作出鬆軟口感。熱力亦會自動調節，三分鐘內反覆加熱恆溫，最後數秒加強火力，表面立即變焦。熱辣辣出爐的多士，好得！脆得索索聲，但中間仍保持軟熟，唔會過乾過濕，普通方包都變酒店級數，平時最憎食麵包的我，連吞幾塊都唔覺膩，更何況一眾麵包控？唯一缺點是要加變壓器，放心，稿尾會再詳細解釋變壓方法。

Steps 1 ：爐上有個加水位，每次烤焗用小杯加5毫升清水。

Step 2：有多士、芝士多士、法包及牛角包模式，如要焗其他食物，可選300W、600W及1,300W火力。

Step 3：時間掣最盡只去到15分鐘，扭掣時會發出顯示燈及聲響。

Details!

即食製成品測試！
多士：★★★★★

Bagel：★★★☆☆

牛角包：★★★★☆

型號：BALMUDA The Toaster K01A-KG
大小：357mm x 321mm x 209mm
重量：4.3kg
電壓：AC100V 50Hz/60Hz（ 1,300W）

No. 2SHARP Healsio抹茶機

日本價：￥17,380/HK$1,182（BIC Camera）
值托率：★★★★☆

綠茶狂熱！在家歎即磨抹茶
還記得去年掀起的抹茶瘋潮，排隊排足幾個鐘亦在所不惜。多得這部抹茶機，讓你安坐家中都能享受濃香抹茶，並非單純用抹茶粉開，而是由茶葉磨成粉末泡成，比用茶壺茶包保存更多營養成分，如兒茶素、維他命及食物纖維等。但最緊要茶味濃，根本不是茶包貨色可比，用來招呼朋友，贏晒！
抹茶機運作就像家用咖啡機，兩年前推出時一鳴驚人，大受日本師奶歡迎，半年內賣出超過11萬部。最新改良版容量更多，一次可製作4杯茶，而且可選擇70或85度兩種溫度，研磨量亦增加。試用一般超市買到的綠茶茶葉，先選擇粗幼度及磨粉時間，再加水攪拌而成。敗筆位是步驟都幾多，而且大部分過程都靠人手，泡出一杯抹茶約需20分鐘。但當按掣見到流出來翠綠甘香的抹茶，好有滿足感！除了抹茶，還可以製作抹茶Latte、焙茶，甚至製作抹茶鹽及粉末做甜品。以後要飲抹茶就可以輕輕鬆鬆，抹茶本來就是讓人放鬆沉澱的飲品，不是嗎？

沖茶8步曲！
Step 1 ：先拆出磨粉器，並選擇研磨粗幼度，沖飲品要用幼粉

Step 2：加入茶葉，7克茶葉可製成2杯抹茶，但冇蓋設計難以放入茶葉

Step 3：按下磨粉按鈕，完成需時15分鐘，磨粉時似攪拌機有少少嘈音

Step 4：在底部小杯取出抹茶粉，磨得非常均勻

Step 5：如沖熱飲，在機背入水位按份量加入清水

Step 6：將抹茶粉放入攪拌器內，如沖冷飲可在攪拌器加入凍水，Latte則加牛奶

Step 7：按下泡茶掣，約3至5分鐘後完成會咇咇聲響

Step 8：底盤可以拆出來清洗

完成品測試！
抹茶：★★★★★

抹茶Latte：★★★☆☆

焙茶：★★★★☆

型號：SHARP HEALSIO茶PRESSO（ TE-TS56V-G）
大小：233mm x 225mm x 296mm
重量：3kg
電壓：AC100V 50Hz-60Hz（ 940W）

No. 3Panasonic 超音波美容器

日本價：￥34,000/HK$2,312（伊勢丹）
值托率：★★★★☆

日本限定！美容機開箱實測
日本限定這四個字，實在叫人又愛又恨。就如Panasonic Beauty 系列，香港行貨種類不及日本多，風筒、按摩系列都是日本獨家發售，當中高貴副線Panasonic Beauty Premium 更是只在全國9個專櫃及官網發售，街舖冇得賣。Premium line 更用上全黑色，感覺更優雅高質。
超音波美容機有角栓、毛孔及面部線條三種模式，分大細兩頭，依照說明書上的建議用法，沿著面部曲線輕輕移動按摩，一秒有100萬次微細震動，每周做三次，每次11分鐘左右，聲稱能令肌膚回復彈性、緊致面部線條及收細毛孔的效果。細頭做鼻翼、鼻樑等細微位夠細緻，而且全機防水，可以邊沖涼邊做。缺點是功能單一，超聲波美容器只能做導入，其他同類產品有溫熱及導出功能，但價錢就會較貴。

全黑包裝盒似鞋盒般大，放入喼都唔算太大。

有說明書、保用證，Queenie稱沒有中文說明書有點不太方便，惟有照著官網的短片做。另有一張用法簡介，方便跟住做。

Queenie試用報告！

Step 1：細頭有邊位，容易會攝入啫喱，清洗唔方便。

Step 2：機身只用一粒掣切換模式，如使用速度太快、太長時間或唔夠貼面，感應器會發出咇咇聲提示。

Step 3：專用啫喱無香料，唔算太「黐𣲷𣲷」，每次只用3克左右。

美容達人陳莉敏Queenie：做時其實冇太大感覺，碌成11分鐘其實都幾悶，可以邊碌邊做其他嘢。
用後感：
黑色機身設計chic，用法唔算太複雜，但做不同部位分模式及大細頭，使用前要先睇清楚。短期效果唔算顯著，不過做時機身會震動，化妝前做可以去水腫。用美容機起碼一個月先有成效，有心變靚，就要持之以恆！

肉眼雖然睇唔到超音波，不過放一點水在機上，即可見到激烈彈跳。

品牌請來日本著名化妝師耕万理子及美容品牌老闆山本未奈子親身試用，並於網上發表用後感，大讚角栓及毛孔模式效果理想，用後肌膚變靚，容易上妝。
型號：Panasonic Beauty PREMIUM超音波美容器EH-XU10 -K
大小：116mm x 47mm x 177mm
重量：260g•電壓：AC100-240V 50-60Hz（ 2W）

No.4 Sharp Healsio 無水電鍋

日本價：￥57,880／HK$3,936 (BIC Camera)

值托率：★★★★☆

全球首部！無火無水自動煮食鍋
我不是烹飪高手，經常希望有人代勞為我煮餐好，在日本發現到這部最新自動煮食電鍋，獨特外形如飯煲，標榜不用加水，就可以做出美味的菜餚，為業界首部無水電鍋。在日本相當火紅，被譽為家庭主婦烹飪恩物。
所謂無水煮食，其實是利用蔬菜及食材內的水份在密閉空間烹煮，所以不用額外加水，全鍋都是食材精華，點會唔好食？無水煮食能保存食材原味及營養，如蘿蔔的維他命C 多1.5倍、菠菜的葉酸又多1.8倍，亦可減少調味，食得健康。電鍋懂得自行控制熱力，又有自動攪拌柄，更可設定時間掣自動煮食，鍋內有85種預設食譜選項，包括咖喱、關東煮等日式家常小菜。返工前將食材放入鍋內，預校時間，放工後就開飯，懶人如我覺得很貼心！缺點是只局限製作燜燉菜式，size 亦唔算細，廚房夠大連變壓器一齊放的話，無慮即決啦。

Details!

有六種不同預設餐單，主力為燜煮菜式，亦可以用作發酵鹽、忌廉芝士、麵包酵母等。

鍋蓋有膠柄作自動攪拌，唔會黏底。

內鍋容量1.6L，2人小家庭最啱使！
Steps：

選擇預設咖喱自動煮食模式，將生食材放入鍋內保溫，待預設煮食時間，電鍋會自動調節溫度火力，準時出菜。
型號：SHARP HEALSIO Hotcook（ KN-HT99A-R）
大小：364mm x 280mm x 224mm
重量：5.2kg
電壓：AC100V 50Hz-60Hz（ 600W）

No· 5 Sony LED 燈泡

日本價：￥23,880/HK$1624 (蔦屋家電)

值托率：★★★★☆

破格！電燈膽會唱歌
圖中其實有一個正在播音樂的喇叭，你搵到嗎？冇錯，看似是普通燈膽，其實，佢同時係一個speaker！真心佩服這個燈膽喇叭，慳位之餘為家居生活多點調劑，最適合香港的蝸居！燈膽小小卻內藏高科技，播音樂利用手機以藍芽連接，靠遙控控制音量及光度，非常方便。配合新開發的圓筒導光板燈罩，燈光似自然光般柔和，但唔算太光，適合在客廳一角或書枱使用。因電壓問題，要另購專用電線再用變壓器。當然，用電話播歌都得啦，但為了生活品味及滿足對音質的要求，這投資，值得。