日本 | 香港食不到的回憶味道！尋找 東京雲狄斯

圖文：yuki@港女講旅行

食回憶之味！尋找東京唯一直營店

好多人去旅行都鍾意試新餐廳、試潮食。不過我呢，就唔介意用1餐quota來回味這間經典快餐店，仲可以探下孖辮「得意妹」！話晒都係我童年偶像，以前仲逼媽咪日日幫我扎孖辮返學架。想在東京食Wendy’s，在上野、六本木都有和另一餐廳First Kitchen的合作店，不過裝修比較潮。想見到孖辮妹，就要去到新宿區住吉町的直營店。一入到店內，牆身、標誌都是「得意妹」的嘜頭，裝修亦都係舊時的紅木牆身、木地磚！

感動！必食正方形漢堡

講到雲狄斯最有印象的，就當然有任斟茄汁，仲有正方型漢堡！不過真心十幾年無食過，淨係記得細個食好味，起碼跑贏老麥N條街。今次點了一個必食的蘑菇芝堡（曾經拎個朝日電視台美味漢堡TOP4），用了記憶中的正方型的漢堡扒（聽聞佢哋用的肉和包都比老麥好，至少唔係生命麵包），入口塊肉又厚，肉味又香，芝士半溶味道超濃，絕對超出了快餐店質素！

追加芝士超滋味

雖然日本餐單無我另一至愛──焗薯！薯條亦都唔係記憶之中的粗薯條，不過勝在有得揀topping，例如煙肉芝士和辣肉醬芝士，又可以加錢追加5款醬料，好似蜜糖芥末、照燒、BBQ醬、芝士、辣蛋黃醬等等，唔會一味死鹹咁寡。
可能會有人笑我傻啦，去到日本都仲食快餐。但明明都係阿斯，個個淨係記得哈迪斯，睇怕我的雲狄斯都回歸無望啦。回憶嘅嘢，用一餐半餐去懷念都很值得啊！而且性價比咁高，跟我一樣的念舊L記得去東京雲狄斯試試。

info
曙橋直營店
地址：東京都新宿区住吉町8番24号
營業時間：8am-10pm
交通：都營新宿線 曙橋駅 2號出口 徒歩2分

浅草合作店
地址：東京都台東區上野7-2-2
營業時間：5am-1am（星期日至12mn)
交通：JR上野駅浅草口

六本木合作店
地址：東京都港區六本木7-14-11
營業時間：7am-1am
交通：東京メトロ 大江戸線 / 日比谷線 六本木駅　徒歩1分