【set頭秘技】短髮造型設計技巧｜日本髮型師秘技 夏日最潮簡單編髮術
撰文：Carmen｜圖片來源：《LDK》
剪短髮最擔心啲咩？
雜誌向讀者進行咗意見調查，詢問讀者關於「唔想剪短」嘅理由。最多人回答嘅理由，有以下幾點：
1）顯得臉大
2）感覺好難設計造型
3）感覺會削弱女性魅力
4）不知為何總覺得不合襯
以上種種原因，日本髮型師都認為只係誤解！只要知道正確嘅短髮造型設計技巧，你就馬上想剪短頭髮了！
日本髮型師親自拆解造型陷阱＆解決方法
1｜基本篇
Q：「Bob」同「Short」有咩分別？
A：後腦部分殘留嘅頭髮較厚的就是「Bob」。比起長度，其實更加以髮尾嘅厚度判斷。後腦部分髮尾較厚嘅，就係「Bob」，沿頭形修剪嘅，則多稱為「Short」。
Q：頭髮長度到咩程度為之「Bob」？
A：長至鎖骨為止都是「Bob」的類別。雖然根據唔同髮型師，定義可能會有出入，但一般而言，長至鎖骨都係「Bob」嘅一種，長過鎖骨就係中長髮。
Q：好想剪短，但怕剪得唔好會後悔⋯⋯
A：由於係定義範圍較廣嘅髮型，剪嘅時候必須提供印象圖片！髮型師表示，長度、剪法、風格都非常多變，單純只講想剪「Bob」嘅話，係無法正確判斷要點剪，所以剪時，記得要帶同參考印象圖畀髮型師睇！
2｜減齡造型篇
Q：剪短會顯老？
A：留長髮時，使頭頂部分扁塌更顯疲憊老態！頭頂部分頭髮帶有豐盈感，大膽剪至稍呈圓，貼臉嘅髮線則呈直線，令臉部線條更俐落，望落更年輕有活力。
Q：髮型有豐盈空氣感會顯得臉大？
A：僅頭頂同耳側打造豐盈空氣感便可。「輕盈」同「俐落」嘅平衡好重要，如果成個頭咁吹出空氣感，好容易會顯得臉大，所以僅頭頂同耳側營造空氣感便可，耳側感覺輕盈嘅話，可令下巴同頭部顯細。
Q：唔識用捲髮棒嘅話，點算好？
A：改變風筒嘅使用方法就OK！
Step 1：逆向吹
由髮尾向髮旋方向，邊用風筒吹，邊用手指分拆開頭髮。
Step 2：將髮線扭成螺旋狀
由頭頂取起一小束頭髮，扭成螺旋狀至髮尾，再由髮根開始吹乾。
Step 3：抓著髮束吹
後腦部分嘅頭髮，由髮根開始抓著髮束，束起髮束後，用風筒吹。
只要將頭頂嘅頭髮髮根吹起，即使唔用直髮夾或捲髮棒都可以同樣造到豐盈效果。頭髮吹乾到一定程度後，可以從反面，又或後方開始吹。將頭髮扭成螺旋髮束後再吹造型，可增加豐盈層次感。
Q：分界無論如何都會令頭髮好扁塌⋯⋯
A：將直線嘅分界變成斜分，就可擁有豐盈感頭髮分界！有時頭髮扁塌嘅問題，可能係因為分界太過劃一。將頭髮中央嘅分界部分，撥部分頭髮到另一邊，好似要將中間嘅明確分界隱藏起來咁，適當地進行斜向分界，不單止令頭髮更有豐盈空氣感，亦更有潮流感。
Q：只係正面整理好就足夠了吧？
A：從正面睇嘅就只有自己！減齡嘅技巧在於後腦！亞洲人後腦偏扁塌，如果唔喺後腦營造出空氣感，會令人望落覺得疲憊，後腦頭髮營造至具有分量感，可有效提升知性美。
Q：頭部邊個部分唔應該整出豐盈感？
A：頭部兩側同後頸要抑制豐盈感！頭頂同耳側就要營造豐盈感，而頭側同後頸嘅頭髮自然俐落，可有效營造小臉效果。而且，後頸頭髮俐落啲，可以令頸部線條更幼長。
3｜小臉造型篇
Q：短髮感覺會顯得臉大⋯⋯
A：露出頸部、後頸線條其實能提升小臉效果！中間分界嘅「Bob」頭難免帶有些微土氣印象。將髮尾再修短，並將分界以8:2比例分開，可令臉看起來細了一圈。再配合長劉海形成嘅陰影，令臉看起來更清爽，線條更分明。
Q：總是不自覺就會將頭髮掛耳，會唔會令臉顯大？
A：想看起來有小臉效果，就只將頭髮輕輕掛一邊耳！將頭髮內側掛上耳仔，外側嘅頭髮輕輕放到耳上，就可有小臉效果！
Q：眉形係現時流行嘅平行眉⋯⋯
A：將額頭闊度伸展開嘅角度非常重要！亞洲人相對比歐洲人嘅五官輪廓冇咁立體、突出，再畫平行眉嘅話，會令臉看起來更不立體。調整眉嘅角度可令臉更有精神，五官更顯俐落。
Q：劉海要點整先顯得臉小？
A：長劉海嘅，就將劉海吹起，短劉海嘅，就營造透風感。長劉海緊貼臉部會強調咗臉容，將劉海由髮根起吹起，營造空氣感，可令臉顯得更立體，陰影亦有助營造小臉效果。短劉海方面，劉海過厚嘅話，會顯得笨重。將部分劉海撥開，露出少許額頭，能令臉看起來線條更俐落清爽。
Q：想側面都有小臉效果嘅話？
A：剪至前長後短！希望側面都有小臉效果嘅話，請髮型師沿下巴線剪至前長後短嘅短髮，可令側臉線條更立體。
Q：出去玩，冇任何工具喺身邊時，都能立即造到嘅技巧？
A：將頭髮集中至頸、臉邊，可顯頸幼＆小臉。
4｜營造潮流感篇
Q：受損頭髮都能剪成「Bob」？
A：將受損髮尾剪走，就能提升頭髮整體嘅光澤感！
Q：頭髮有光澤感嘅話，有咩好處？
A：集中光源，可令皮膚狀況看起來更好！唔少人以為頭髮嘅光澤感源於「水分」，但其實並非水分嘅問題，而係「光的折射率」。頭髮可使光源集中，令肌膚看上去更明亮。相反，頭髮乾旱毛燥會使得肌膚亮度看起來暗淡。
Q：除咗剪頭髮，仲有冇其他潮流造型？
A：可從髮尾著手，用捲髮棒隨意捲出不同造型，都可輕鬆打造年輕感髮型。
Q：剪短頭髮後，感覺唔適合著好女性化嘅裝束⋯⋯
A：短髮可以將V領同深色服裝穿出更女性化嘅感覺！長髮會將鎖骨同頸部線條隱藏咗，著深色服裝時，亦會令頭髮似同衣服混成一體，短髮就恰好可以擊退呢啲問題！
Q：受損頭髮可透過頭髮護理修補嗎？
A：最好方法係剪走。已受損髮絲無論用幾咁高級嘅護理產品，都無法完全恢復。與其執著受損頭髮，不如注重多啲新長出嚟嘅頭髮。
5｜編髮造型篇
Q：剪短咗係咪就無法編髮？
A：可綁頭髮、夾起、放下等等，短髮嘅編髮技巧更精彩！
劉海 → 將劉海分界換邊就能改變整體感覺！頭髮無法束起嘅話，一直都係同樣髮型，睇耐咗都悶親自己啦！咁嘅話，就由頭髮分界著手，乾脆斜向分成8:2分界，就可以營造出成年人嘅性感感覺。
綁髮 → 將頭頂部分頭髮拉出高度，喺後頸、耳邊留下髮絲，係現時非常受歡迎嘅造型！
1：從兩側隨意抓起頭髮，隱藏頭髮分界線。
2：耳邊頭髮刷上髮蠟，將內側髮絲掛到耳後，外側髮絲輕輕蓋住耳朵。
3：在後頸同耳邊位置留下少許髮絲，然後決定綁髮位置。
4：用橡筋束好後，將頭髮逐點拔鬆，調整豐盈感。
外捲 → 日本流行嘅外捲造型，一個唔小心就會變成動漫人物般嘅感覺。髮型師嘅解決方法係，沿頭部至頸部線條捲曲頭髮便可。要注意整體平衡感，而非只著重髮尾鬈曲程度。
用髮夾固定→ 直向分界嘅話，將頭髮分開左、右、頭頂共3束，髮量多嘅可分成4束，會更容易固定。
1：將頭髮隨意分成3束，先將其中一束向中央位置，往同一方向扭動。
2：用髮夾固定。其餘2束均同樣做法，髮夾嘅固定位置最好重疊到同樣位置。
3：用一隻手按著髮夾附近位置，另一隻手逐點逐點將頭髮輕輕拔鬆，調整豐盈感。
4：如有鬆脫出嘅頭髮，可用髮夾將前端勾起，按進髮束中。
1：勾起一束頭髮，扭成條狀後，用髮夾固定，為頭髮增加動感。
2：扭動髮束後，固定位置不對稱就OK！營造出冇造作感。
3：有頭髮鬆脫出或有散開嘅話，可用髮夾前端勾起髮絲，將頭髮按進髮束中。
髮夾選擇→ 推薦金色髮夾！任何髮色都適合。
使用髮蠟 → 冇時間又綁又夾的話，直接用髮蠟產品等將頭髮向後順，即可有造型感！
