【東京近郊行程】(有片) 3日2夜東京近郊觀星+富士山溫泉行程

撰文：Carmen ｜圖片來源：JR東日本、河口湖オルゴールの森美術館、富士河口湖觀光中心、天空の楽園、昼神溫泉鄉、銀河もみじキャンプ場、網絡

使用JR TOKYO Wide Pass（JR東京廣域周遊券）

是次行程嘅進出點設定為新宿，而呢張JR Pass可以喺東京成田＆羽田機場，或者喺新宿站嘅新南口、新宿站JR東日本旅行服務中心等大站買到。於日本國內購買價格為10,000円，使用限期為指定開始日起連續3日。

DAY 1：新宿→ 河口湖

使用JR Pass由新宿坐至大月站，再轉富士特急線往河口湖站（車程約2小時10分鐘）。

河口湖景點：

河口湖音樂盒之森美術館

名為美術館，實際其實係個音樂主題公園，館內包辦觀光、聽音樂、體驗活動、飲食、購物，標榜快行可以玩90分鐘，慢慢玩可以玩足一日。館內最大特色係有好多自動演奏樂器，配合埋美術館極具異國風情嘅設計，好有代入咗《美女與野獸》嘅感覺。

叫得音樂盒之森，就梗係唔少得買音樂盒啦！唔單止可以買，仲可以體驗親手製作音樂盒。音樂以外，仲有特製朱古力同原創熟成紅酒。

玩到攰想食嘢，就可以安坐餐廳，奢侈地邊望住富士山，邊品嘗美食。

音樂館內係一大片玫瑰園，有720種品種，1,200棵不同顏色嘅玫瑰。9月份有大波斯菊、藍星花、鼠尾草、天竺葵等帶有秋色嘅花種睇！錯過咗6月嘅玫瑰盛放期，都仲有多種花睇！

觀光資料：
河口湖音樂盒之森美術館（河口湖オルゴールの森美術館）
前往方法：於河口湖站乘的士（車程約16分鐘）或在河口湖站的1號巴士站乘「河口湖周遊レトロバス」接駁巴士到美術館前下車
入場費：成人1,500円、中小學生800円
官方網頁：https://kawaguchikomusicforest.jp/

大石公園

大石公園位於河口湖北岸，可以一次過睇勻河口湖同富士山嘅景色！而且一年四季都有唔用嘅花睇，無論咩季節去都唔會失望而回。

公園西側仲有全長350m嘅「花街」，呢段夏末至初秋嘅時期，更可以欣賞到一大片掃帚草！由6月下旬至10月初旬，亦有全長130m，高3m嘅秋海棠「花之瀑布」！10月中旬至下旬則可睇到掃帚草紅葉。

地址：
【大石公園】山梨縣南都留郡富士河口湖町大石2585
前往方法：
【大石公園】於富士急行線河口湖站前乘坐河口湖線旅遊巴，在終站自然生活館下車

河口湖天上山公園

可於河口湖乘覽車上山頂嘅「河口湖天上山公園」，園內有散布四周嘅兔仔同狐狸嘅擺設。除此之外，仲有祈禱觀光客及登山安全嘅「兔子神社」，守護符都係粉紅色嘅兔仔形狀！

設置喺展望台嘅心形「天上之鐘」，剛好同面前嘅富士山重疊，係一個特別嘅power spot！祈禱戀愛及冇病冇痛嘅人群會排隊敲鐘。

地點資料：
河口湖天上山公園（カチカチ山ロープウェイ）
地址：山梨縣富士河口湖町淺川1163-1
前往方法：於河口湖站乘坐河口湖周遊巴士，約11～16分鐘車程（於遊覽船ロープウェイ入口下車）
相關資料：http://www.fujiyou-koutuu.com/sightseeingspot/

河口湖住宿：

1） $2,607起・湖南莊
望住富士山食懷石料理

酒店的最大賣點，是全部的客房都擁有無敵的景觀，但必須於（河口）湖景或（富士）山景之中二揀一，不能貪心！另外，大部分房間都在近年翻新及裝修過，不少更增設露天溫泉，最適合追求私人空間的遊客！如果不想花太多錢，入住一般客房都可以於大浴場及天台的湯足邊浸邊欣賞富士山！

景觀：★★★★☆
舒適：★★★★★
設備：★★★★☆

富士山溫泉,河口湖溫泉 — 設有私人露天風呂的客房，一起身便可以望住富士山，每晚價錢多千五蚊左右，但絕對是值得付出的！

2）$1,304起・富之湖酒店
超抵住！睇晒山景湖景

全館都是西式客房，部分更設有露台，可以同時間欣賞富士山加河口湖景色！酒店雖然比較殘舊，但大浴場的富士山景色一流，加上房價平，不想花大錢又想住溫泉酒店的話，可以考慮！
景觀：★★★☆☆
舒適：★☆☆☆☆
設備：★☆☆☆☆

其他住宿地方選擇：http://www.kawaguchiko.or.jp/kawaguchiko_stay_map.html

DAY 2：河口湖→ 阿智村

使用JR Pass由河口湖坐到大月，再乘往小淵澤。喺小淵澤下車後，需轉乘JR中央本線・松本行或其他途經上諏訪站嘅電車。（※JR Pass範圍不包括由小淵澤到上諏訪的車程，出閘時需到服務中心補約496円，如乘坐特急電車需補約1,246円）（車程約2小時30分鐘）

阿智村天空之樂園

阿智村位於長野縣嘅南方，被大自然圍繞，係日本環境省認定的日本第一靚星空嘅村。阿智村標高約1,400m，因為地點夠高，市區嘅燈光照唔到上去，高地亦拉近咗同天空嘅距離，睇星星特別清。

每晚8點，天空之樂園就會舉行晚間觀星tour，名為「SOUND OF THE STARS」，會場會將所有燈光熄滅，然後彷彿伸手可及嘅無盡星空，就會蔓延開來。

滿天星空之下，大會更會安排導賞進行星空解說，以及播放原創影片。會場亦安置咗大量天文望遠鏡，進行觀星活動，仲有超人氣，「星星哥哥的爆笑starlight show」等各種娛樂活動，令你嘅觀星之夜唔係真係只得睇星！

活動資料：
天空の楽園　日本一の星空ツアー
地址：富士見台高原ロープウェイヘブンスそのはら〒395-0304 長野縣下伊那郡阿智村智里3731-4
入場費：成人 2,200円、中小學生 1,000円、未就學兒童免費※包含吊車來回乘車費
前往方法：在茅野站乘坐穿梭巴士（來回・完全預約制）到Star Village阿智（スタービレッジ阿智）【車程約1小時20分鐘】
官方網址：http://sva.jp/

阿智村住宿：

1）湯多利之里伊那華

特色：10種岩盤浴（具排毒美容效果）、露天浴池、個人湯屋

景觀：★★★★☆
舒適：★★★★☆
設備：★★★★☆

套票價格包埋觀星會場接送同吊車乘車票，優惠期為4月14日至10月20日，一晚價格約11,500円起。包早、晚各一餐，旅館對出就有一條小溪流「阿知川」，附近更有靚爆花桃之里，4月尾～5月初係花桃嘅開花期，約5,000棵紅、白、粉紅色花桃盛放。

2）湯元酒店阿智川

特色：洞窟風呂、美肌湯溫泉、露天浴池

景觀：★★★★☆
舒適：★★★★☆
設備：★★★★☆

呢間係溫泉酒店，而且同樣有觀星套票，預訂套票更會送埋你一人一支酒店原創嘅酒「天空的水滴（300ml）」作為禮物。套票優惠期為4月14日至10月20日，一晚價格約16,620円，包早、晚各一餐，同觀星會場接送服務，酒店附近更可到農園體驗摘水果，或者參加半日巴士遊，發掘昼神好玩嘅地方！

其他住宿選擇：http://hirugamionsen.jp/tw/accommodation

銀河紅葉營地

覺得又上又落好麻煩嘅話，仲有一個經濟又實惠嘅地方，一個地點搞掂晒觀星＋住宿！

位於阿智村浪合嘅銀河紅葉營地，係太平洋暖地形氣候同日本海寒冷地氣候嘅交界，被大自然包圍，向南方向仲有一大片冇遮擋嘅天空，係夜觀星象嘅絕好地帶！營內區域全部用星座嚟命名，個feel即刻出晒嚟！

遊客可選擇租住帳篷或木屋，木屋主要分為2大區，白樺區被一片白樺木林圍繞，夏天非常涼爽，全幢AC電源完備；紅葉區於午分時間起，就可以睇到一整片藍天，晚上更可以睇到猶如銀河嘅星空！但需要留意嘅係，營方唔會提供床或其他睡眠用品，係要自己帶去！想更有氣氛嘅推薦住帳篷，仲可以邊燒嘢食邊觀星。

不過要book呢個營地就會麻煩啲，網上預約嘅話，要填表格再電郵番畀營地，而且表格只有日文。營內規則較多，地點偏僻，想去嘅話，最好搵識日文嘅朋友同行，自駕遊嘅話會方便啲。唔揸車嘅話，就要做好啲功課喇！即使唔想住營，都可以只買票入觀星熱點嘅高爾夫球場睇星星。

活動資料：
銀河もみじキャンプ場
地址：〒395-0501 長野縣下伊那阿智村浪合1771-1
前往方法：乘JR飯田線於飯田站下車，轉乘信南交通嘅巴士到こまんば，再徒步約10分鐘
官方網址：http://gingamomiji.org/wp/

DAY 3：阿智村→ 新宿

第3日係JR Pass最後嘅使用限期，於是就搭盡佢，返東京都放心啦！首先搭番巴士出茅野站，乘坐JR中央本線・塩山行往小淵澤（約410円），再喺小淵澤坐JR東日本線到新宿，旅程嘅最後就以大都會shopping嚟收尾！

東京近郊3日2夜行程路線整理

DAY 1：東京新宿→ 河口湖

・使用JR Pass乘JR東日本線到大月，再轉富士急行線前往河口湖（車程約2小時10分鐘）
・遊覽河口湖景點
・入住河口湖當地酒店

DAY 2：河口湖→ 阿智村

・使用JR Pass由河口湖坐到大月，再乘往小淵澤，於小淵澤下車後，需轉乘JR中央本線・松本行或其他途經上諏訪站嘅電車
（※JR Pass範圍不包括由小淵澤到上諏訪的車程，出閘時需到服務中心補約496円，如乘坐特急電車需補約1,246円）
（車程約2小時30分鐘）
・於上諏訪站乘坐直達巴士前往昼神溫泉（※完全預約制・來回票價2,500円）（車程約1小時30分鐘）
・遊覽昼神溫泉鄉／附近景點

・觀賞日本第一星空
・入住阿智村當地溫泉溫店