小心騙案！日本大國藥妝店被控經常出錯：產品被換成空盒、價錢計多30倍！
廣告
去日本掃貨點少得掃藥妝，好多人都會覺得日本出品必屬佳品，所以掃貨的時候都會好放心，可能無check清楚貨品，亦可以唔會仔細check單。不過近日，日本大國藥妝店就被台媒爆出，經常有呃人事件發生，好多台灣網友都分享中招經驗，大家以後去掃貨，真係要小心為妙！
text：Cynthia｜photo：TVBS 截圖
台媒報導 大國藥妝店騙案
大國藥妝店在日本是大型連鎖的店舖，很多地方都有分店，幾乎每個城市都會搵到，加上藥妝齊全，價格又平，係好多旅客指定掃藥妝的地方。不過近日台灣媒體就報導，大國藥妝經常出錯，價錢算錯、產品數量打錯、產品拎錯空盒，失誤的次數多到已經唔係唔小心咁簡單！而網友更加分享，喺不同分店都曾經中招，包括心齋橋、新宿等，絕對唔係得一間兩間有問題，呢類問題防不勝防，最好都係自己望多兩眼睇清楚啊！
網友分享 受騙經歷
有唔少台灣網友，都在網上分享自己慘痛的經驗，有網友就分享自己明明只係買咗4盒，結果店員就打咗62盒，足足畀多咗¥20,000！另外亦有網友分享，自己喺新宿分店買了5萬幾yen產品，當時無檢查清楚係咪有齊，結果返到台灣，先發現少咗一罐¥7,505的ZS錠！數齊貨品都唔好咁安心，一定要摸摸每個盒內係咪都有產品，因為有網友就係買完無check，結果係個眼線筆得個盒，入面咩都無！
普通話店員 要特別小心
有唔少台灣網友都分享了跟團時候，導遊曾經叮嚀他們，最好不要去大國藥妝店，因為是中國人開的店，所以入面會有好多假貨，或者店員會係扮日本人的中國店員，因此好常會有掉包事情發生。雖然中國人開店之說太誇張沒有根據，不過見到普通話店員的話，都要更加小心！
購物時多加小心
好多網友都分享因為係喺日本，無諗過會有被騙事件發生，所以就會鬆懈唔檢查買的產品。其實這樣的做法非常唔可取，唔想有損失的話，記得一定要睇住店員入單，買得多可以直接同店員講數量，避免出錯。離開店舖之前，都一定要看對一次單，再摸摸每一個盒係咪會有嘢，就最放心啦！
