【西營盤】刁鑽！好味！全港最多英國有機揀手貨

May 21 2015

政治不正確都係咁話，記者呢啲舊香港人，又去過英國留學的，硬係有種情意結，關心Princess Charlotte 多過魯平。所以早前行過西營盤，見到高街小店Cabinet Organic 有大量英國有機食品時，有如發現寶藏咁開心！原來店主Jason 也曾在英國讀書，因而特意從那裡引入坊間少見的有機或公平貿易品牌，300多呎小店、700多款貨品中，至少八成為英國貨！

不過Jason 笑說學生時代沒錢買有機貨，認識有機也是後來的事：「有次返英國旅遊，太太在當地超市買來包裝精美的有機產品試食。一般覺得有機咪就係天然啲、健康啲，但其實可以好好食！」他特別著重食物味道，難怪舖內不少產品都攞過英國Great Taste Awards 或SoilAssociation Organic Awards，無論健康和味道都有保證！