100％專屬粉餅！ innisfree 推「氣墊粉餅ATM 」百款設計任你揀～

Apr 29 2016

女孩子對於「專屬」兩個字可以話係零抵抗力，事關佢哋就怕就係同人「撞嘢」，撞衫、撞鞋、撞袋等等等等，最好身上嘅嘢係呢個世界上就係萬中無一，得自己先有！韓國彩妝品牌 innisfree 就睇準女孩子嘅「獨佔」心理，近日喺首爾街頭推出「My Cushion ATM」快閃店，等大家可以透過部氣墊粉餅ATM 操作機，自行設計100％嘅專屬粉餅，連少女時代嘅潤娥（Yoona）都有玩埋一份，快閃店去到7月尾，大家係時侯Get ready 喇！

「氣墊粉餅ATM 」自製過程

「氣墊粉餅ATM」唔係畀你拎錢，反而要你乖乖玩完佢之後畀錢！大家可以隨個人膚質、喜好，自行調配粉底質地、氣墊類型同粉盒款式，的確好玩。各位就算唔識韓文都唔駛擔心，因為部機有埋英文畀遊客們睇～大家放心去玩吧！

Step 1：揀好語言，唔怕揀錯嘢！

Step 2：按膚質揀粉餅功效，有強效持妝（Longwear Cover）、水感（Water Fit）同保濕（Ampoule Moisture）可供選擇。

Step 3：選擇粉撲類型，強調水潤感及高遮瑕度妝感可選Glow Puff，想要輕薄貼服妝感則可選Fitting Puff。

Step 4：選擇色系，有12色系可供選擇。

Step 5：選擇粉盒花紋設計，提供7款紋及淨色。

Step 6：仲可以幫專屬粉餅改埋名！

Step 7：揀好所有嘢拎埋張收據去畀錢就搞掂啦！

平日留意開 innisfree 都知道，品牌出嘅產品設計都以簡單平實為主，所出嘅氣墊粉餅盒更係純白色，唔係唔靚，不過略嫌單調！而今次 innisfree 就一次過出夠100款粉餅盒設計，今次真係唔怕揀唔啱，最怕係款款都想要，唔知揀邊款好！快閃店除咗有「氣墊粉餅ATM」玩之外，仲有埋展覽畀大家欣賞 innisfree 嘅美妝設計。

唔好以為美妝品一定只搵仙女級的女神做代言人，今次innisfree就找來韓國人氣諧星－李國主拍廣告片，拋開以往只搵來偶像藝人嘅包袱，引來超爆笑效果，記者愈睇李國主嘅可愛演出就愈想要，呢個新系列預計5月1會於韓國店上架，咁到底幾時先會嚟香港呀？