April Skin VS Etude House大熱彩妝筆! 邊款打造小臉效果最自然?

May 21 2016

早前Etude House推出的彩妝筆Play 101 Stick系列抵港，引來大批女生搶購，每次去Etude House或水貨舖，熱門顏色總會缺貨。其實韓國仲有唔少品牌推出彩妝筆，當中以BB cushion成名嘅 April Skin 亦都出咗彩妝筆，同樣有胭脂、光影同陰影筆，究竟會唔會有驚喜？記者Sam即刻同大家試呢兩大品牌嘅彩妝筆，睇吓邊款打造小臉效果最自然！

Etude HousePlay 101 Stick

Etude House Play 101 Stick喺香港已經好受歡迎，大家都應該好熟悉，因為呢個系列有埋粉底，所以一共有11隻色，包括4款粉底、3款光陰影同4款胭脂。不過，由於呢款妝品係膏狀，要用化妝掃或海棉推開會較自然均勻，Etude house另外會有專用化妝掃畀你配埋。價錢方面，韓國Etude House一支彩妝筆賣12,000 Won（港幣$79），但香港就賣$124一支。

Etude house就要另外再配化妝掃韓國價9,000 Won/支；香港價 $75/支（官方圖片）

April Skin4D Stick

April Skin 推出的4D Stick外型同Etude HousePlay 101 Stick系列差不多，都係筆狀，有胭脂、光影同陰影筆。不過April Skin彩妝筆內藏化妝掃，而顏色就少2隻，得粉紅胭脂、橙色胭脂、光影同陰影筆。而April Skin就比Etude House貴，一支彩妝筆要17,000 Won（港幣$111）。

April Skin彩妝筆內藏化妝掃，唔駛另外配掃咁麻煩。（官方圖片）

記者試用報告！

由於夏天興清新粉橙妝容，今次除咗會試光影同陰影筆，仲試埋橙色胭脂，會試用April Skin 4D Stick 3號色和Etude House 101 Play Stick 15號色。論賣相，April Skin全黑彩妝筆較簡約，感覺型格d，而Etude House就色彩繽紛，比較可愛。

試Etude HousePlay 101 Stick

彩妝筆質地好creamy，用掃好易推開，不過略嫌少許過笠，而且會好容易甩妝。陰影好自然，但光影稍為過閃（影相有偏差），望落有少少出油感覺，而橙色胭脂較鮮色。

試April Skin4D Stick

質地同樣好creamy，仔細d試會覺得呢款冇Etude House咁笠，不過內置掃比較難將彩妝推開。陰影光影效果都好自然，較顯色令個樣即刻立體哂，而橙色胭脂較粉色。

彩妝筆試用評分表！

總結：
－兩款牌子的彩妝筆顏色有少許分別，想化橙色妝容，鮮色d可以揀Etude House，粉色d可以揀April Skin。
－胭脂筆仲可以當唇膏用，不過比較淺色，皮膚較黑未必適合（由於記者皮膚較黑，所以冇試到上咀）。
－April Skin彩妝筆顯色度較高，令個妝容立體感大增。
－Etude House光影筆閃粉較多，望落有少少出油感覺，所以妝容睇落唔太自然，可能韓妹鍾意嘅光澤感唔太carry到。
－兩款牌子的彩妝筆感覺都係好creamy夠滋潤，好易推開，不過Etude House稍為笠少少。

－價錢方面，韓國官方Etude House係平d，但喺香港的話，水貨舖價錢差不多（下文會提到購買點）。

用彩妝筆小tips！

宜家夏天又熱又濕，用呢d膏狀化妝品可能會怕好易溶妝又會笠，化完成個妝可以揀隻乾爽d嘅碎粉定妝，咁就可以keep住個妝成日喇。

Etude House
官網：http://www.etudehouse.hk/

April Skin
官網：http://www.aprilskin.com/

香港邊度有April Skin買？

April Skin雖然喺香港冇分店，但有好多水貨舖都有呢個牌子嘅產品買，價錢約$98-$110不等，想再搵平d就要用心d格價喇！

Maskland
地址：九龍觀塘成業街11-13號華成工商中心8樓7室（顯示地圖）
營業時間：星期一至六 11am – 8pm；星期日及公眾假期 11am – 7pm
官網：http://www.maskland.hk/
Instagram：maskland.hk
價錢： $98/支

Shegoes to Seoul
地址：九龍觀塘成業街16號怡生工業中心G座1樓（顯示地圖）
營業時間：星期一至五 12nm – 8pm；星期六日 12nm – 6pm
官網：http://www.shegoestoseoul.com/
Instagram：shegoestoseoul
價錢： $110/支