韓妹新捧3大化妝品牌 PONY EFFECT 出限量4色眼影
人氣化妝師品牌 PONY EFFECT
韓國人氣超強Beauty Blogger Pony出名化妝化到出神入化，扮邊個似邊個，最近仲扮埋美國歌手Taylor Swift，化妝技術簡直係超班！佢推出個人美妝品牌PONY EFFECT，一向都受到韓妹追捧，除咗包裝夠靚，質素仲非常高。今季推出新包裝以玫瑰金為主調，型格又高貴，非常吸引！
Pony每一個部位都化得好仔細，化完睇落真係好似Taylor Swift！
新版4色眼影
去年推出了4色眼影，每盒入面嘅4款顏色點揸都咁自然，而且眼影做得非常幼細，令眼妝好貼服，仲可以keep成日，得到超多人好評。Pony最近喺品牌Facebook page公佈嚟緊4月19日，將會推出新版4色眼影，一共6隻色，淨係睇包裝已經好想買，推出當日會有優惠，仲要數量有限，將會引嚟大量粉絲瘋狂搶購！
眉膏
除咗眼妝對妝容非常重要，眉毛都唔可以馬虎，因為眉毛同頭髮顏色唔同，就會令成個妝好奇怪。今季推出咗5款顏色眉膏，眉掃質地夠柔軟，而且設計令上妝輕易又方便。最淺色係打底眉膏，打完底再上返適合自己顏色眉膏，令眉膏選色唔會有偏差。
唔知如何用眉膏，可以睇吓Pony嘅教學。
磁石化妝掃
品牌產品一向都走型格路線，連化妝掃都唔例外！呢款新出嘅化妝掃，每一支掃嘅底部都要有磁石，可以放置喺磁石收納架或磁石板，無論上下左右倒轉擺都得，又型又方便！而且唔會令到化妝掃變形同污糟，呢個設計真係好貼心！
化妝掃因為有磁石，點放入收納架都唔會跌！
不過，PONY EFFECT冇專門店，但樂天免稅店、弘大el cube和較大的olive young店可以買到，而網購的話，可以到MEMEBOX、11ST和GMarket網站。
PONY EFFECT
網站：http://ponyeffect.com/
氣墊粉底之首 W.Lab
之前有為大家介紹過W.Lab推出的氣墊粉底，除咗有足夠遮瑕力外，其已通過韓國食藥局認證，確定產品中唔會含化學物質，有唔少韓國Blogger都將佢同April Skin的氣墊粉底比較，仲話佢好用過April Skin，令到唔少女生立即去掃貨。W.Lab今個月又推出了新氣墊粉底，仲比之前的更透簿，而且佢推出其他新產品，光影及陰影筆，一樣咁受歡迎。
W.Lab一向要網購先買到，今年喺韓國開咗實體店，去韓國就買到，方便好多！
花氣墊粉底
花氣粉底係之前嘅升級版，主打內含33%玫瑰精華，帶有淡淡的玫瑰香味，佢嘅花花賣相已經令唔少女生著迷，佢遮瑕作用依然好強，有保濕、美白同撫平細紋功效，但比之前的更簿更自然，可做出光澤蘋果肌，而且唔會痴立立，啱哂夏天用。
粉紅妝前乳
呢支粉紅妝前乳簡直係懶人恩物，唔駛揸粉底咁麻煩，淨係用佢就可以出街見人。佢可以修飾臉部顏色，令皮膚即時變得嫩白均勻，而且仲有抗皺、保濕同遮瑕作用。
唔少韓國blogger都力推呢款產品！
光影及陰影筆
除咗要靠角度的重要性，打光影陰影亦對小臉有幫助。呢兩支光影陰影棒，易用又方便，令妝容自然，臉部輪廓突出之餘，塊臉都變細咗！
去片教大家點樣用呢款產品！
W.Lab
地址：서올 마포구 홍익로 6길 4（顯示地圖）
網站：http://wlab.co.kr/
韓星孔孝珍代言CLIO
CLIO唔算係新品牌，不過近期新品好吸睛，有印章式粉底，而且得到好多Blogger好評，仲搵咗女星孔孝珍代言，所以多咗人留意呢個牌子。宜家喺韓國有好多分店，數量就仲多過Etude house喺香港嘅分佈！
其實香港屈臣氏都會有CLIO產品，不過就冇新產品賣，所以想試新品嘅朋友就要耐心等候喇。
印章式粉底液
最新推出印章式粉底，Kill Cover系列粉底液，附上印章外形嘅特製海棉，海棉設計獨特，可將粉底液印上臉上每一個角落，亦可輕易將粉底液推開至均匀，持久度亦都非常高。
網上亦都有教學可以知道印章海棉嘅用法，令粉底液容易印上臉上每一個角落，而且十分貼服。
啞色唇膏唇彩
同樣比較新嘅產品，啞色唇膏和唇彩，迎合今年韓國啞色咀唇妝嘅熱潮。視乎女生鍾意邊款，兩款產品持久度好高亦好出色，唇膏一d都唔乾，仲好creamy，一共有8款顏色，而唇彩則較滋潤，有6款顏色選擇。
超強防水眼線筆
Kill Cover系列的防水眼線筆雖然唔係新品，但唔可以睇少，佢2014年曾登上韓國美妝節目《InStyle》明星美容大獎（InStyle Star Beauty Awards），喺韓國認受性超高。除咗筆尖夠幼，佢防水力超強，非常持久，記者都一試愛上！而呢款產品喺香港屈臣氏有得買，唔駛特登去韓國。
