「布丁染髮」韓國大熱!!! 理想與現實試用報告

Apr 15 2016

繼早幾年好流行的泡泡染髮後，韓國又有新品，流行用布丁染髮。睇廣告以及水貨店的宣傳照片，似乎效果十分好，就算是粉紅色、綠色、藍色這些顏色都染得到，所以今派出記者Mandy，試一試到底布丁染髮係咪真係咁好用，想知有冇中伏？即睇試用報告！

布丁染髮即係咩？

所謂布丁染髮，指的布丁並非食物，而是把兩支液體染髮劑搖勻，產生化學作用後，染髮劑便會變成布丁質地，便可用手輕易上色。不過老實講，布丁質地其實與髮型屋使用的普通染髮膏有點相似，所以似乎只是噱頭而已。

布丁染髮系列都有幾多顏色，今次選擇的是啞色系列的4.61 Ash Pink顏色，官方的效果圖十分吸引，不過以Mandy的染髮經驗，啞色通常都要漂髮方可上色，所以今次決定試吓在唔漂頭髮的情況下，到底出唔出到咁靚嘅顏色。

首先要讚返，布丁染髮的製造商十分貼心，包裝內除了染髮劑以及護髮素外，亦附有手套，仲有膠圍裙以及膠耳套，以免染髮劑弄髒衣物及耳朵，超貼心，抵讚！

兩支染髮劑倒進膠杯內，搖勻後就會變成布丁質地。

同泡泡染髮一樣，都係可以徒手染，不過略嫌有少少論盡，因為染髮膏好容易飛濺到周圍都係，要小心使用。

老實講，染完分別不大，勉強睇到由原本偏金色的淺啡，變成偏紅的淺啡，想像中的灰、紅、粉紅通通都無出現，實在有點失望。

至於髮根位置，兩截色的情況十分嚴重，幾十蚊貨仔本來亦不期望黑頭髮可以立即變淺色，但現在亦略嫌太黑，布丁染髮染出一個布丁頭。

不過公道d，即使到髮型屋染灰紅色，亦試過要染兩次才上色，而且在太陽底下才會比較顯色。不過效果與官方圖片相差太遠，所以才會失望。總括而言，如果想染特別的顏色，還是找相熟髮型師比較好，這類DIY染髮產品，試用完、過吓癮就可以了。

關鍵詞