影Selfie更上鏡！外遊必備5大扮靚法寶＠Miss Sunny

（Presented by Maybelline）

1｜迷你捲髮器

Sunny今季都剪咗個中長度髮型，唔用捲髮器set返個頭真係唔見得人，但大大支實在太礙位，好彩畀我發現而家有啲mini嘅捲髮器，可同時捲到直髮同曲髮，熱力足夠仲有環球電壓，咁就去到邊都可set 到個頭！

2｜隱形眼鏡盒裝護膚品

細細個嘅隱形眼鏡盒其實好好用，將平日用嘅cream 及精華素裝入去，唔怕漏夠輕巧方便，袋喺化妝袋上機可隨時補妝，旅途中唔怕皮膚乾燥或敏感。

3｜Cushion 遮瑕 筆

化妝品中Sunny最緊張底妝用品，除咗粉底，一支方便易用嘅 遮瑕 筆係超重要！旅途中溶妝都可隨時補，所以Sunny超鍾意Maybelline支cushion 遮瑕 筆，cushion頭薄薄一層輕印就做到高coverage 效果，佢遮黑眼圈真係好掂，唔使帶綠色紅色嘅concealer，一支搞掂晒！selfie前補一補對眼即刻sharp晒！

4｜迷你保濕噴霧

旅行最怕皮膚乾到爆，自己可以用幾滴玫瑰精油加蒸餾水，裝入細細支保濕噴霧，補妝前噴一噴，除咗保濕，玫瑰香味仲令成個人即刻fresh晒，迅速趕走倦容。

5｜支裝即棄眼藥水

戴大眼仔con最容易令雙眼乾澀，外地濕度有時乾過香港，帶定細細支即棄眼藥水，隨時幫雙眼保濕，唔怕對眼唔舒服，影相時亦唔怕出晒紅筋！