ViuTv藝員部大地震！獨捧「造星」幫 合約藝人慘被開刀
撰文、圖片：東方新地
靠捧《全民造星》小鮮肉上位 監製花姐橫行ViuTv
去年ViuTV就效法韓國人氣偶像選秀節目《 Produce 101》而炮製出選秀節目《全民造星》，因為有多間大型唱片公司力撐，節目和一班參賽者成功掀起話題，冠亞季軍姜濤、陳卓賢及楊樂文，加埋一班參賽者更組成跳唱組合Mirror 簽約ViuTV旗下發展，極速成為公司賺錢台柱，負責節目監製的花姐亦因此上位。據知情者透露：「《全民造星》爆咗，班𡃁仔參賽者吸納到唔少粉絲，ViuTV嗰邊即刻將佢哋分組成Mirror同Error兩個組合，全面力捧，特別係Mirror走韓仔鮮肉路線，組成無耐已經搶到唔少廣告，班仔出晒 位，監製花姐咪攞晒彩，本來佢只係做監製，未做過經理人，但佢揸住班鮮肉喺手，唔畀其他人沾手呢兩隊組合，自己仲做埋經理人，每每製作新節目都會預埋Mirror同Error，搞到原本喺經理人部門班藝人，變得投閒置散，冇演戲經驗的姜濤被安排拍劇做埋男主角， Error孭飛拍旅遊節目，反而一班舊合約嘅藝人，連主持節目嘅機會都少咗！」
重整經理人部門 ViuTv一姐黃心美離巢全台收入大跌
一朝天子一朝臣，近日ViuTV盛傳會縮緊經理人部門，向舊一班藝人開刀。據知情者透露：「因為幫公司賺到錢，花姐喺經理人部門簡直打橫行，魯生（電盈PCCW interactive董事總經理魯庭暉）同金生（ViuTV製作部副總裁金廣誠）都好睇重佢，好多嘢都放手畀佢搞，近排佢話要重整經理人部門，想集中火力去捧Mirror同Error喎！其實以前藝員部有一姐黃心美都試過年賺千萬，但自一姐離巢，最做得嘢嘅經理人又走埋，一班藝人變咗孤兒仔冇人理，藝員部收入跌到七彩，先畀花姐攝到位上，依家花姐要換血，想叮走賺唔到錢嘅藝人，變相經理人部門嚟緊亦會縮窄，藝員同員工都人心惶惶！」
孤兒仔藝人變犧牲品 有樣有身材都無得留低
ViuTV大部分藝人都係以部頭合約合作，即 一份合約只做一個節目，只有小部分出生自Now TV的合約藝人簽長約，由大國文化藝人管理有 限公司做經理人，而去年組成的組合Mirror和 Error，則直屬ViuTV經理人旗下，唱片合約則簽 約大國文化。
亦有另一批合約藝人由NowTV轉會，當中李佳芯男友陳炳銓，還有身材突出的Hailey（陳俞希），夏雨兒子黃奕晨，另外有選美出身 的譚凱倫，不過近日盛傳公司會重整經理人部門，這班藝人成為被開刀對象。花姐獨大，齋捧《造星》幫無可厚非，最慘係一班孤兒仔藝人變成犧牲品！
