TVB重頭劇《殭》睇前4大分析！
1 大玩食字位
TVB 劇集人名玩開食字就見怪不怪，但今次《殭》嘅玩法可以話係出神入化！今次由人名到劇情細節都唔放過，食字程度仲畀網民話似用咗中二病（此詞來自日本，意指以誇張嘅虛幻世界套到現實中）命名法，勁似以前中學時期睇開嘅網絡愛情小說，勁騎呢！
離地角色名
由鄭嘉穎飾演嘅不死人叫刑活著，係未寓意指仍然活著？陳嘉寶、黃又南兩兄妹又叫何年同何月，謝安琪、陳凱琳兩姊妹一個叫藍夢南，一個叫藍夢瑤，似足舊時啲愛情小說女角名，仲未計羅蘭姐叫黃紫紅、陳山聰叫凌風、秦煌叫拜金堅……媽阿，呢啲名好離地呀！
食字細節位
說話原來鄭嘉穎喺劇中主理一間餐廳，而呢間餐廳名叫「夜唔夜」……即刻令網民諗起萬梓良喺《專釣大鑩》嘅金句……
另外，原來劇中鄭嘉穎亦係有一間專以訓練殺殭屍門派嘅大佬，而呢個門派竟然係叫隨意門，記者隨即想起我哋由細睇到大嘅多拉A夢。
2《殭》左抄右抄同類劇？
《殭》宣傳片推出後，就已經畀網民話喪炒過往同類劇集。其實，劇集故事嘅嘢又有咩話抄唔抄呀……記者覺得，都係如有雷同，實屬巧合……只係今次巧合嘅地方就比較多……
同《我和殭屍有個約會》人物設定相似
睇返人物對照，就會發現《殭》同《我》嘅人物設定有異曲同功之妙之處，鄭嘉穎嘅刑活著角色同尹天照喺《我》嘅況天祐兩個都係由古代嚟到現代，一個喺明朝，一個就喺民初時期；另外兩個都有與各個角色之間的聚腳點，一個係深宵食堂，一個係酒吧，同樣比人傾計聚會！再者，兩個角色功能都係不死人＋砍妖除魔！
另外，二人亦總有幾個跟班幫手做嘢。《殭》就以陳嘉寶、黃又南同陸永為鄭嘉穎嘅入門弟子；《我》就以況家幾代殭屍「幫拖」。
而且，兩劇都總有個搞笑角色！當年《我》就有杜汶澤飾演嘅金正中做諧角；《殭》就有陸永做簡霆斯為套劇營造搞笑氣氛。唔知陸永發放笑彈拍住得當年嘅杜汶澤呢？
同埋當年《我》嘅馬小玲出身嘅馬家同《殭》嘅「隨意門」又係好類似，又係有班人誓言要消滅殭屍……
嗱嗱嗱，唔好話我哋係唔係都話佢抄嘢呀，事關無線早前嘅《老表，你好hea》早有前科，抄足馬小靈同況天佑嘅情節嚟抽水㗎！
【《老表，你好Hea！》X《我和殭屍有個約會》】【《老表，你好Hea！》X《我和殭屍有個約會》】聽到呢首歌，彷彿馬小玲同況天佑轉生到另一個平行宇宙一樣～無線抽水抽到盡，連CCATV都唔放過…
Posted by 爆片王 on Thursday, 23 October 2014
抄足美劇《點到即止》特異功能
女神Kay飾演嘅女殭屍角色有一個名為「一指靈」嘅特異功能，只要指一指屍體，就可以令屍體甦醒一分鐘。而於2010年喺明珠台播過美劇《點到即止》（Pushing Daisies）嘅主角又係可以指一指就令人起死回生一分鐘，記者估，都係咁啱……掛。
深宵食堂vs《深夜食堂》？
劇目講到明為鄭嘉穎開間《夜唔夜》係深宵食堂，睇返啲場境同日本電影《深夜食堂》做比較，嗱！咪話一樣呀，上下兩張圖係唔同㗎，真係咁「巧合」㗎咋！
3 千篇一律關係圖
《殭》除咗講殭屍線，男女感情線緊係唔少得，咪以為呢套劇有個咁創新嘅題材就會有複雜而深層次嘅人物關係呀，事關心水清嘅觀眾應該一睇無線出嘅人物關係圖，應該就會推算到關係發展，咪就係都係A鍾意B，B又暗戀C，C又鍾意A，呢啲不變公式，唔明講緊咩？睇吓下面兩個框就明啦！
4《彊》播映前夕 網民反應
網民對呢套劇嘅期望各有差異，部分網民話期待女神Kay 嘅首次電視作品，亦大讚題材吸引，但亦有網民話怕呢套劇只係多套劇嘅合成之作，而且劇集選角唔吸引。
唔知大家今晚又會揀Viu TV定TVB呢？
將來還有什麼演唱會值得留意？
有不少歌手宣布舉辦演唱會，小編為你整合了香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
