30歲Coffee林芊妤網教瑜珈月吸廿萬「殘廁Gathering 」成功洗底變師奶OL偶像

Apr 23 2020

新冠肺炎疫情籠罩下，香港人連月來留家抗疫，全港學校已經停課幾個月，興趣班亦大受影響，實體學校冇運行，身為瑜伽導師的Coffee（林芊妤），肺炎疫情下瑜伽班難逃停課厄運，向來最識轉危為機的她，近月便轉型主力網拍教學，除了出動一歲得意囝囝「伯伯」吸Like，連老公都落場幫拖做示範，早前開了個人YouTube運動頻道的她，連月閉關在家，透過社交網密集式Po片，一家三口網上教學，每條片動輒有數十萬個Like，威過唔少天王巨星，月吸廿萬疫市有出路。

原文刊於《東方新地》

Coffee林芊妤靠瑜珈成功洗底私人教學$2,000/hr

一舉成名天下知，唔理好事定醜事，只要有了知名度，原來都是一個商機，14年爆出「殘廁Gathering 」事件令在無綫六年來寂寂無聞的Coffee（林芊妤）一夜成名，雖然被無綫炒魷，卻並未打沉Coffee意志，未幾在網上頻開live晒fit爆身材，更加做埋瑜伽導師，令她廣受關注，前年嫁銀行高層翟德彥做埋人妻，去年誕下得意米之蓮囝囝「伯伯」，更令她人生逆轉。

其實早在12年，Coffee已考獲國際認可的瑜伽導師專業資格，近年她全力發展瑜伽事業，由於身材長年有睇頭，產後十日便成功收身，加上她經常在網上示範瑜伽大顯身手，同網友分享運動與健美心得，為她吸盡人氣，成功洗底成為唔少師奶及OL追捧偶像，開班授徒客路大增，每次開堂極速爆滿，團體班要500元一堂，個別教授更高達2,000元一小時，後來更成為圈中藝人如胡杏兒的私人教練，賺錢能力今時唔同往日！

近年成功轉型做瑜伽導師的 Coffee，隨著囝囝出世形象更健康正面，即使比堅尼出Po，一樣正評如潮，成為人氣網紅的她，就算肺炎疫情瑜伽班停課，靠網絡人氣仍為她帶來賺錢商機。

Coffee 離巢無綫後專心做瑜伽教練，人氣更勝做藝人時，早前獲ViuTV邀請，為伍詠薇主持的《埋嚟睇埋嚟玩》做嘉賓。

胡杏兒生完大仔 Brendan，坐完月後，搵Coffee做私人教練，於產後四個月成功修身，多得口中「魔鬼教練」Coffee。

運動頻道有百萬訂閱囝囝老公助陣

不過，近月受新冠肺炎疫情影響，瑜伽班全面停課，加上近日政府立法「限聚令」，瑜伽班復課遙遙無期，以往真身落場上堂及網上開班多線發展的她，兩個月以來，便轉型全力網教，在個人社交網密集式出post，拉埋老公及囝囝落場幫手做示範，一家三口吸客。據知情者透露：「Coffee大肚時喺網上大玩高難度動作，令班師奶同OL睇到嘩然，令佢響晒朶，囝囝出世之後，成功洗底，每次同囝囝一齊出鏡特別受歡迎，爆發肺炎疫情，佢好快已經轉型，實行全力網上出Po，仲拉埋老公囝囝落場，佢喺YouTube嘅運動頻道，有近百萬訂閱，好多廣告商睇中佢形象健康，由服裝、電器、入廚用具等都落廣告喺佢度，囝囝仲有童裝贊助，只要佢喺社交網出個Po就有錢落袋，疫境個個冇工開，叫苦連天，佢可以話賺到笑！」

識得睇準時機，一家三口發放正能量，又抵Coffee狂收Like嘅！