82歲鍾景輝患癌消瘦 失聯半年為養病
廣告
一代戲劇大師鍾景輝（King Sir）的專業精神人所皆知，16年做定期身體檢查時發現患上大腸癌一期，要即時入院接受微創手術，康復後King Sir 未有放棄幕前工作，去年中又為無綫拍《牛下女高音》，永不言休。已82歲的King Sir抗癌後消瘦不少， 體力亦大不如前，今年4月黃心穎搞出的「安心事件」差點令《牛下》石沉大海被禁播，不過最後卻因姣心穎戲份唔多而逃出生天，而且仲好有口碑。 身為劇中關鍵人物的King Sir，在去年9月煞科宴現身後，無在公開活動現身，有傳他因為健康關係要長期休養，近月更一度失聯，下月舉行的台慶頒獎禮，無綫力邀King Sir撐場亦未能如願。身體健康大於一切，祝 King Sir早日康復，可以再拍多啲好戲。
撰文、圖片：東方新地
鍾景輝三年前患癌靜休後繼續作育英才
三年前因為患上大腸癌一期，鍾景輝（King Sir）退出與愛徒陳國邦合演的舞台劇《相約星期二》，而佢有份參演的無綫處境劇《愛．回家之八時入席》亦要休假。入院接受微創手術後，King Sir休養了一段短時間即蠢蠢欲動要出關，當時他接受訪問時表示好彩癌細胞冇擴散，不用進行化療，未幾他已經返回他開設的戲劇學校繼續開班講課。
《牛下女高音》為無綫的告別作 「安心」事件險累劇集播出無期
至去年King Sir劇癮大發，返無綫與一班老戲骨合作拍了《牛下女高音》，當時見他身形消瘦了不少，而拍劇辛苦更令他元氣大傷，故去年9月劇集一煞科，King Sir即開始閉關休養，今年4月黃心穎與許志安被斷正出軌，一度有傳《牛下女高音》需要重拍才能出街，本刊記者5月時曾致電King Sir，已發現他氣若游絲，據知情者透露：「之前無綫都有搵人聯絡過King Sir，睇吓有冇可能重拍《牛下》，當知道King Sir身體狀 況唔能夠應付，大家都唔想勉強，所以最後都打消重拍念頭。到《牛下》決定要播同開始做宣傳，有好多次都搵唔到King Sir，後來有傳佢好唔舒服要入院，其餘時間都要靜休，大家 都唔敢再打擾佢老人家，不過下個月台慶頒獎禮，無綫真係好希望邀請到King Sir露面，但據知最後都畀King Sir屋企人拒絕咗喇！」
《牛下女高音》出街後大獲好評，King Sir絕對居功不少，據知《牛下》將會是他在無綫的告別作，而結局篇更掀起高潮，飾演白校長的他在圓夢後卻在家中於睡夢中離世，令 不少網友被劇情深受感動，不過King Sir卻因為要靜休養病，而缺席所有祝捷活動，近月他都未有親自接電話，即使有記者因劇集大受歡迎想問回應，他都只以短訊回覆。希望King Sir養好病，可以繼續中氣十足出山演戲啦！
