69歲李司棋享受人生選擇自由工作 少女心爆發做IG達人

撰文、圖片：東方新地

李司棋曾左耳突發性失聰 選擇自由工作唔再搏

18歲就當選「香港公主」入行的司棋姐，07年拍《溏心風暴》憑大契一角封視后，美貌同演技早就獲認同與肯定，近年拍劇只為過戲癮，17年獲金牌監製劉家豪邀請復出拍《溏心風暴3 》，拍劇期間卻突然左耳突發性失聰，加上長受耳鳴困擾，令她決定完劇後休息一段長時間養生兼享受人生，近年即使不停有監製敲門找她拍劇，她亦全部拒諸門外。

據知情者透露：「拍劇衝衝衝嘅時間一早過咗，司棋姐又做過視后，已經冇大野心，近年佢都係自由選擇工作，17年因為家豪哥出面邀請，佢先復出接拍《溏心風暴3 》，話晒當年《真情》善姨角色同《溏心風暴》大契都係家豪哥為佢打造；不過，拍《溏心風暴3 》無耐，佢突然左耳失聰，拍到後期真係好吃力，所以先決定拍完套劇畀自己放長假，雖然休息咗一排，耳鳴已經唔太嚴重，舊年做咗五場舞台劇，但TVB好多監製想搵佢出山拍劇，佢全部推晒，佢好清楚自己性格，一拍劇就瞓晒身，佢唔想再捱更抵夜，驚自己頂唔住！」

減產享受生活 少女心爆發做IG達人

減產享受生活的司棋姐，近年更成為IG達人，自從17年開通個人IG帳號，她就經常更新同粉絲分享生活點滴，比唔少年輕藝人更緊貼潮流，經常潮牌上身外，更學少女擺長腿及撒嬌甫士，獲網民勁派Like。

新正頭，司棋姐繼續活躍社交平台亦出動辦年貨，日前她就駕車到九龍城著名雜貨店買金華火腿等賀年食品，只見她入到舖頭同店員邊傾邊細心揀貨，當日司棋姐一身潮人小羽絨打扮，非常醒神搶眼， 活得精彩其實好簡單！