51歲鄭嘉穎回巢無綫拍劇挑戰新角色 妻債夫還疫市下獲TVB加酬勞

原文刊於《東方新地》

陳凱琳為生B推劇轉型做KOL

現年51歲的鄭嘉穎，與細二十二年的13年冠軍港姐陳凱琳，在18年感情修成正果，兒子鄭承悅（Rafael）轉眼已經十六個月大，早前「 520 」大日子，鄭氏夫婦更公開再陀B喜訊。有仔萬事足的Grace，婚後一直專注家庭，同嘉穎都熱愛小朋友，自18年拍完劇集《包青天再起風雲》，已經兩年冇再拍劇，生B大過天，對無綫剩餘的幾年合約只好採拖字訣，多次向無綫推劇。據知情人士透露：「Grace本身好鍾意小朋友，生咗Rafael之後，更加母愛氾濫，湊仔事事親力親為，連事業鬥心都冇埋，佢完全唔捨得離開個仔半步，有時出外工作太耐，佢都會心掛掛，所以只會揀啲唔太困身，時間短嘅活動或者廣告先會接，一做完嘢就會即刻撲返屋企湊仔，雖然生完一路都有監製搵佢復出拍劇，但Grace完全冇興趣，一嚟唔捨得個仔，二嚟佢兩公婆一早諗住盡快追多個，既然決定趕生B，根本冇時間接劇，Grace仲話唔想錯過Rafael每個成長Moment ，近年已經轉型做KOL，方便安排時間！」

不過，同無綫還有頗長合約的Grace因拖劇太久，高層亦曾出面斟她復出，現在兩年抱兩，拍劇恐怕難上加難，同無綫向來關係友好的鄭嘉穎，就出面幫Grace還債，等老婆專心做全職媽咪。早前因新冠肺炎閉關幾個月，嘉穎近日亦開始收拾放假心情，陸續開工賺奶粉錢，除了日前為電影《焚身》開機，離巢無綫三年的他，已答應七月回無綫拍新劇《兒童醫院》。

同無綫關係友好幫老婆還劇債

據知情者透露：「雖然喺內地知名度高，嘉穎有唔少工作，但始終新冠肺
炎疫情未全面受控，屋企仔細老婆嫩，佢都唔想返內地開工住，而且佢好享受家庭生活，叫佢離開老婆同個仔太耐佢都唔捨得。咁話晒佢出身 TVB，一路以嚟係樂易玲愛將，佢喺無綫機會好多，又做埋視帝，嗰時公司又肯放佢返內地拍劇，如果唔係都唔會拍到《步步驚心》、《葉問》喺國內爆紅，就連老婆Grace，樂小姐都好睇重，所以嘉穎離巢之後，同樂小姐都 keep住友好關係，對於 Grace多次推劇，嘉穎都覺得唔多好意思，所以今次樂小姐傾佢返嚟再拍劇，嘉穎都冇托手踭，除咗為幫老婆還劇債，更重要係還人情債！」

同羅仲謙拍檔首次做醫生

在無綫十七年，鄭嘉穎一直備受力捧，早在06年，已經憑《天幕下的戀人》揮低陳豪、林保怡及林峯首奪 TVB視帝，又拍過不少為他度身訂造的好角色，先後演過消防員、鑑證人員、律師、重案組沙展、拳手等，不過多年來，原來嘉穎都未曾演過醫生角色。據知情人士說：「其實樂小姐一路都好想嘉穎返嚟拍劇，今次畀嘅酬勞都高過以前好多，加上近期 TVB有唔少破格嘅劇集，嘉穎對再拍劇都好有信心，今次更加係首次演出醫生角色，佢覺得好有新鮮感，而且經過近期肺炎疫情之後，大家對醫生都好有親和感，今次拍檔仲有同樣係新手爸爸嘅羅仲謙，相信到時開工又可以圍埋交換湊仔心得！」萬事有老公嘉穎來頂的陳凱琳，當然可以安心做幸福少奶奶！