43歲陳展鵬囡囡發燒全家戒備驚青煎Pang抗疫有妙計

Feb 27 2020

成家立室後的陳展鵬（煎Pang），被妻女治得貼貼服服，工作以外時間全奉獻，既要親力親為湊女，為氹老婆單文柔更花盡心機。近月新冠肺炎肆虐，人心惶惶全城抗疫，護女心切的煎Pang亦唔例外，高度戒備盡量唔帶小豬比陳諾瑤出街，點知過年時親友強烈要求要見 B，煎Pang盛情難卻一時心軟，親友聚會後小豬比竟發高燒。十個月大的小豬比首次發燒，足以令緊張爸爸肉都痛，病癒後全家防疫意識大大提升，洗手消毒做到足，煎Pang更用妙計教識小豬比自己抹手消毒及乖乖戴口罩。非常時期，細菌無處不在，小豬比留在家中最安全，而煎Pang就同老婆單文柔上山抖氣兼過二人世界，呢個防疫方法兩全其美。

撰文、圖片：東方新地

陳展鵬娶細14年落選港姐廿四孝爸爸成形

近年圈中掀起結婚生B潮，陳展鵬都唔執輸，18年10月把細十四年的落選港姐單文柔私有化，半年內完成結婚生女兩件人生大事，女兒陳諾瑤（小豬比）轉眼十個月大，以往慣常把私生活低調處理的煎Pang，有女萬事足，忍唔住在社交網大晒小豬比的成長點滴，無論工作有幾辛勞，見到囡囡都愛不釋手，廿四孝爸爸早已成形。

今年的2月14日情人節，陳展鵬送了 99支紅玫瑰給單文柔，不過就講明係今世老婆同前世情人(小豬比)共享，一物二用。

囡囡出世後，陳展鵬絕無大細超，會安排與單文柔外遊享受二人世界，早前他要飛去泰國拍攝《逆天奇案》外景，單文柔也有同行，寓工作於娛樂。

新手爸爸陳展鵬好稱職，為減輕老婆負擔，囡囡一出世即學餵奶、換片同沖涼，放假帶女出街奉旨爭住抱，錫到小豬比燶。

產後單文柔全職湊女，所以囡囡特別黐佢，有時仲會搞到爸爸呷醋。小豬比眼大大面圓圓，五官似晒單文柔，兩母女都皮膚白晳成個餅印一樣。

堅持自己抱囡囡親密接觸可免則免

老公煎Pang負責賺錢孭起頭家，單文柔可以印印腳留家湊女，做咗鵬嫂人氣與身價都急升，閒時接商演出席品牌活動，Hea做唔憂米，對於單文柔來說，事業早已不再重要，相夫教女才是第一位。早在疫情仍未如此嚴峻時，夫婦二人不時抱女兒外出，單文柔更曾帶她出席公開活動見世面，眼大大肥嘟嘟的小豬比與媽咪餅印一樣，真是人見人愛。雖然家有外傭幫手湊B，但煎Pang與單文柔每次外出都女不離手，據知夫婦二人都非常小心，外出堅持自己抱實小豬比，不會隨意讓別人抱她，避免她接觸到外來病毒。知情者透露：「雖然係新手父母，但煎Pang同Phoebe（單文柔）都睇咗好多關於照顧年幼嬰兒嘅書同資料，因為囡囡仲細抵抗力較弱，所以唔可以掉以輕心，新冠肺炎未殺到佢哋已經盡量唔畀個女出街，因為小豬比有時會啜手指，呢樣佢哋最擔心，就算去街都唔會立亂畀人掂小豬比，點知人哋隻手有冇菌㗎！」

前單文柔帶埋小豬比出席公開活動，並由老公陳展鵬揸車送到銅鑼灣鬧市，雖然有外傭與助手同行，但她堅持自己抱實囡囡小豬比。

流住港姐與視帝血的小豬比果然非同凡響，面對鏡頭毫不畏懼，同媽咪合照仲笑得好開心好甜。

小豬比肥嘟嘟有成廿磅都唔輕，單文柔全程抱實都好辛苦，活動後要用 Hip seat 輔助。

過年出席親友團拜活動豬比曾高燒至39度

在爸媽的守護下，十個月大的小豬比食得、瞓得又玩得，不過早前過年煎Pang卻因為一次錯誤決定而非常自責，事緣因為之前拍劇太忙碌，不少親友向煎Pang投訴太耐未見過小豬比，於是年初二就帶囡囡出席親友團拜活動，見到可愛妹個個都搶住抱，因為拜年活動全部都是自己人，煎Pang避無可避，而小豬比即晚就唔舒服發燒，更曾高燒至39度，囡囡出世以來首次發燒，令煎Pang與單文柔擔心不已，疫情加流感肆虐，令煎Pang當機立斷帶小豬比去醫院求醫，幸好只是普通感冒，小豬比服藥後翌日就退燒。雖說小病是福，發燒後可增強抵抗力，但小豬比這次發燒驚魂已嚇到煎Pang鼻哥窿都冇肉，此後煎Pang一夫當關，決意把家中防疫戒備升級。知情者說：「過年之後，小豬比就冇再出過街，煎Pang話會盡量避開去人多擠迫嘅地方，不過佢同Phoebe都會出街抖氣，每次都會做足全套防護措施，返到屋企即時全身消毒沖埋涼先會掂個女，就連家人同外傭都重新教育，確保屋企時刻都喺無菌狀態。不過最勁都係小豬比，因為發燒期間佢喺屋企都要戴口罩，煎 Pang同Phoebe會陪囡囡一齊戴，等佢知道爸爸媽媽都一齊戴，初時畀佢戴啲公仔口罩，同佢影相兼讚佢靚靚咁就唔會抗拒。」

初二參加親友團拜活動後，小豬比返家當晚即發高燒兼肚屙，陳展鵬與單文柔，漏夜帶囡囡去求醫，好彩第日已退燒，陳展鵬才放下心頭大石，單文柔仲開心到喊。呢對緊張爸媽從此對囡囡的衞生防疫程度升級，深怕囡囡受感染。

自從年初二囡囡發燒，陳氏夫婦幾乎足不出戶留家抗疫，曾公開表示想呼吸新鮮空氣的單文柔，終於忍不住拖老公出關拍拖，日前她與陳展鵬都在社交網分享行獅子山放風照片，單文柔留言：「我要爬上呢座山。」卻被老公取笑：「爬？登山」

湊女都要抖氣，早前疫情未嚴峻，記者拍到這晚陳展鵬與單文柔撇甩囡囡去九龍城按摩，二人曾被本刊影過多次都係幫襯同一間泰式按摩店，早已是熟客。

囡囡戴罩唔扭計身教最緊要

大人就話易調教，戴口罩、洗手與消毒做齊可以防疫，但十個月大的小豬比還是小Baby，戴口罩同無時無刻都消毒對她來說絕對是有難度，不過煎Pang卻引以為傲，表示囡囡已習慣戴口罩，不會亂扯。早前煎Pang把一家三口戴口罩外出的合照放上社交網，即被網民追問如何可以令小豬比乖乖戴口罩，煎Pang即以專家口吻回應網民，強調不要整痛小朋友，BB第一次試的所有事，都要令她覺得好玩，不能強迫。煎Pang 同單文柔肯定不時在小豬比面前洗手同抹手，所以精靈的小豬比亦有樣學樣，已經識得自己在飯前用濕紙巾抹手消毒。生於疫世，有種責任，希望疫情受控，等小豬比可以出街呼吸新鮮嘅空氣啦！