43歲少爺占疫情下廚藝進步搣甩「地獄廚神」稱號

新假期 - 影視

Mar 26 2020

廣告

近來因新冠肺炎，學生持續停課，唔少打工仔又轉為WFH，大家都聽從醫生建議，盡量避免聚會同出外。冇得出街食，又要慳口罩，最好方法當然自己下廚，唔少人因呢次疫情廚藝進步不少，地獄廚神都搣甩呢個稱號！其中一個成功例子就係少爺占啦！

原文刊於《東方新地》

少爺占疫情下廚藝進步日台泰菜都識煮

商台DJ少爺占（甄子康）都變成一家之煮，近來只要6歲囝囝Timmy話想食乜，少爺占都想盡辧法煮出嚟，好似台式肉燥飯、泰式冬陰功、日式溫泉蛋等，主菜之外，連甜品都炮製埋，呢個老竇真貼心 ﹗唔單止咁，為了停課的Timmy安排活動，少爺占仲安排親子焗麵包㖭！

阿仔一句話想食泰式肉碎飯，老竇少爺占立即鑽研煮出來，之後仲有飯後甜品西米布甸㖭，睇佢笑得咁滿足，阿仔一定讚好食。

同其他家長一樣，學生停課，最忙是父母，少爺占安排宅在家的囝囝，一起親子焗腸仔包。

2013年少爺占自爆同青梅竹馬嘅幼稚園同學Tina於06年結為夫婦，14年囝囝Timmy出世，事業家庭兩得意。

哈日族無得去日本同家人相處更開心

不過其實少爺占變身煮夫之前，都係一個會買外賣返歸醫肚嘅人，早排疫情未見嚴重嘅時候，少爺占喺商台放工後，唔係立即返屋企，而係揸車落九龍城買外賣，見佢買嘅份量至少兩個人食，相信係買番去同老婆囝囝一齊開餐啦 ﹗疫情令哈日族少爺占冇得飛去日本，計劃打亂，但多咗同囝囝相處嘅時間，日日煮健康餐畀囝囝食，增進父子情仲可以食得有營㖭！

少爺占早前喺商台收工，之後去咗九龍城呢間粥粉麵檔買外賣，菜牌都唔使睇，仲同老闆娘好好傾，一定係熟客。

少爺占拎住一袋三盒嘢，相信係一家三口嘅晚餐。

買完立即揸車返歸，少爺占呢個外賣仔好稱職。

關鍵詞