40歲王祖藍移居上海全家出動賺人仔 安排李亞男內地頂級醫院生B

原文刊於《東方新地》

40歲王祖藍家中三條Queen

現年40歲的王祖藍，同太太李亞男結婚五年有心有力，今年父親節，王祖藍一家三口拍片宣布太太李亞男懷上第二胎，雖然一度有傳亞男今胎是陀 B仔，但據悉李亞男今胎亦是陀 B女。據知情者透露：「自從大女 Gabrielle（王天韻）出世之後，祖藍見到個女已經嗒晒糖，個女又鍾意黐佢撒嬌，簡直就係祖藍嘅小情人，所以知道再生女，又會多個女嗲佢，祖藍不知幾開心，佢知道太太陀 B辛苦，兩公婆都決定生完呢胎之後休息吓，等亞男可以回吓氣，追仔遲一步先再打算！」

王祖藍Book定醫院頂級產房

13年憑內地綜藝節目《百變大咖秀》在國內爆紅的王祖藍，事業愈戰愈勇，內地工作接到冇停手，雖然今年一度因新冠肺炎疫情停工，不過近月內地疫情緩和，王祖藍已極速接下排山倒海的內地工作，以往完成一項工作，便會攝時間返港陪妻女的他，為方便照顧陀著第二胎的太太李亞男，索性一家移居上海。據知情者透露：「年中內地疫情開始緩和，祖藍已經接咗好多工作，始終老婆陀住 BB，佢唔放心留亞男一個人喺香港獨力照顧個女，所以一早已經安排亞男同囡囡返內地居住，佢喺上海租咗個過二千呎物業做三口子嘅安樂窩，咁就算飛內地唔同地方開工，都唔使隔離，來回好方便，有時拍兩三日嘢，佢可以趕返屋企陪亞男同個女，自己可以貼身照顧亞男佢亦安心好多！所以暫時祖藍都未有計劃幾時會返香港！」現時陀B約九個月的李亞男個肚已經相當大，太太臨盆在即祖藍亦非常緊張，早在內地 book了頂級醫院產房迎接二女來臨，亦計劃好停工陪太太入產房生 B，幸福人爸到時湊女又有排忙！

王祖藍為李亞男炮製驚喜生日派對 老婆興奮老公緊張：「小心生咗個B出嚟！」

出名愛妻的王祖藍早前為老婆慶祝生日，他深知老婆李亞男愛熱鬧，早已安排了好友蔡少芬、孫耀威及太太陳美詩等，在亞男生日當天躲藏家中炮製驚喜派對。原本打算一家人食個飯就算的李亞男，看到一眾好友突然現身果然非常雀躍，這時祖藍即打趣叫懷疑的老婆要小心，不要因為太興奮動了胎氣「小心生咗個B出嚟！」

亞男事後感謝老公安排驚喜：「原本今年生日都係諗住一家人食餐飯就算，估唔到祖藍安排咗幾位好朋友嚟同我慶祝，覺得好Sweet。（第二胎就嚟出世？緊張嗎？）期待啦，希望佢肥肥白白、健健康康、開開心心咁成長就OK。」