獨家！38歲譚凱琪單拖殺入高危街市 攻讀營養學自度安胎餐

原文刊於《東方新地》

譚凱琪單拖殺入高危街市

婚前三年已經搬入前男友現老公莊日宇（Enrico）置入的九龍塘帝景峰單位，明明有工人姐姐可代勞就近又有大型連鎖超市，日前卻見 Zoie一個人驅車出發，專程去到南山邨街市買餸買糧。近日爆發疫情第三波，各區舊式街市正是最高危重災區，而 Zoie光顧的南山邨街市超過四十年歷市更是殘破不堪、地下濕滑、猶如迷宮。明顯知慳識儉幫襯開好熟路，陀 B後又依然身材纖瘦行動便利，知碇買好水果蔬菜、又小心翼翼識得避開濕滑地面，不過防不勝防，來到豬肉檔買豬𦟌和瘦肉煲湯，還是遇上肉眼都睇到污糟不堪的豬肉檔，和豪邁奔放真空無上裝又勇武處理食物都唔戴口罩的豬肉佬，一塊砧板切肉係佢、收完數放下紙幣係佢、裝好豬肉放低膠袋都係佢，口水、血水、紙幣上的細菌交織融和不知道已經交叉感染變型了幾多輪，大肚婆嚟講，真係危機四伏。

第三波後知驚禁足

本刊致電 Zoie，問候懷孕近況、又了解吓當天情況，好彩 Zoie再三澄情，本來的確喜歡行街市、享受入口食物自己採購自己把關，不過疫情再爆後，已經識驚全日留家：「嗰次去街市因為當時十幾日冇本地感染，身邊的確個個都放鬆咗好多。其實有 BB之前我都係鍾意煮又鍾意研究食材，屋企人飲食不嬲都係我負責採購。揀南山邨都係因為方便泊車啲嘢又齊，我諗住趁住個肚未係大、身體又冇乜不適，可以做就盡量做呀嘛。不過最近爆第三波，我真係乖乖再冇出街，買餸都係用apps叫人送上門嗰啲。」至於是不是為了養胎和腹中寶貝未來健康飲食學埋營養學，Zoie表示不盡是：「呢個課程可以長期報讀，初級、中級、高級之後再考埋認可都仲得。我個人飲食習慣一直都好檢點，無論中醫調理、食療保養都好有興趣留意開，咁有時間可以學多樣嘢，唔影響 BB又唔影響生活，就會繼續學落去。」

大肚後BB大晒 攻讀營養學自度安胎餐

拍拖八年年初結婚，Zoie婚後表示財政獨立、享受工作會繼續拍劇。不過果然小生命可以改變心態，今時今日工作事業大計完全不一樣：「生完之後仲會唔會工作，我真係唔知，唔知到時 BB出世之後會唔會唔捨得；讀營養學有冇機會繼續讀落去甚至做營養師，我都冇特別諗，呢個時候唔想畀太多壓力自己。不過我諗我都想湊 BB以外可以有適當嘅工作可以做，唔想淨係單一做個全職媽咪。」恐怕又多一個有戲又有觀眾緣靚媽媽將會淡出幕前踏入人生新階段！

為人母往往想給兒女最好的，不少圈中女星就是在為人母後甚至十月懷胎
時，已經悉心研究食物營養和配搭，最後索性讀埋營養學，咁就包保寶貝仔女食入口最健康有營。