獨家！38歲唐詩詠回頭箝46歲馬國明 無懼疫症連日密會遭斷正

撰文、圖片：東方新地

馬國明搣甩姣穎有運行 同唐詩詠再續前緣

馬國明因「安心事件」因禍得福，撕破黃心穎真面目後忍痛分 手，整個人醒神晒，仲識開竅成功爭取視帝，所有運返晒嚟。早前黃心穎被斷正與RubberBand成員泥鯭（黎萬宏）去海怡工廈搜購狗用品，前度釣泥鯭，馬明亦不愁寂寞，回復單身十個月，一直有契妹唐詩詠在旁扶持，近月兩契兄妹更過從甚密，關係之親密前所未有。

姣心穎釣回復單身泥鯭齊齊買狗用品

指專搞人夫的黃心穎，日前被影到與RubberBand成員泥鯭一齊去買狗用品，更有傳去年盛傳上姣心穎寓所的商台DJ，其實就是貌似林海峰的泥鯭。事後黃心穎解釋因收養了唐狗而搵有經驗的泥鯭幫忙，而泥鯭則澄清與未婚妻結唔成婚，現時單身。

連日接送唐詩詠 一架車兩份揸默契十足

有個錫到自己燶的契哥馬明，唐詩詠當然會好好利用，早前下午3時半左右，家住太古城的馬明駕車前往唐詩詠位於清水灣半島的寓所樓下，未幾戴住口罩包到冚的唐詩詠跳上車，前往坑口村後，她落車去寵物店買了一塊貓抓板，相信是買給她的新寵小貓蛋蛋，而馬明一直留在車等她，之 後馬明送唐詩詠返家，放好東西後二人再同車外出。

另一日黃昏6時左右，本刊記者見唐詩詠揸住馬明的Benz 返回清水灣半島，她下車後馬明即返回司機位，自駕返太古城。現場所見，唐詩詠與馬明默契十足，看來一架車兩份揸並非第一次，而馬明更熟練地為唐詩詠遞上一個裝住外賣小食的紙袋，彼此關係盡在不言中。這日馬明在停車場泊好車後，一身運動打扮的他表示最近因新型肺炎肆虐， 與唐詩詠及黃嘉樂等人一齊做運動打發時間，更表示因順路而車載契妹，叫大家不要誤會。

馬國明親自回應：唔好諗咁多

記：你有鄰居確診新型肺炎，見你仲頻頻出街？
馬：都唔驚嘅，做足防禦措施，戴口罩同勤洗手，用酒精搓手液，唔去太多人嘅地方ok 嘅！

記：今日你約唐詩詠去邊？
馬：哦！今日我哋去咗做gym，因為黃嘉樂搵到個健身地方好少人好清靜，所以我哋約埋一齊去做gym。

記：見你哋呢排見得好密，詩詠仲揸你架車喎！
馬：純粹做運動，唔好諗咁多啦！

記：但係你仲成日做司機管接送？
馬：都係一齊去食飯，順路兜埋佢啫！

其實馬明家住太古城，與唐詩詠寓所相距甚遠， 連日車出車入看來絕對不是順路呢！