獨家直擊！34歲賴慰玲萬能師奶真身 戲內霸氣逼人戲外即變賢內助

原文刊於《東方新地》

賴慰玲湊仔家務一腳踢

對於時下職業女性乜都倚賴工人，賴慰玲卻享受做家頭細務不假手他人，更不介意工作同時兼顧家務，名副其實入得廚房出得廳堂，囝囝梁進也出世時，賴慰玲亦只用陪月一個月，後來才請工人姐姐幫手，不過湊仔打理頭家全部親力親為。據知情者透露：「好多女人都好怕做家務，莫講話要兼顧工作，但Winki睇法就好唔同，佢覺得呢個係女人天職，同老公分工合作都係夫妻生活嘅情趣！佢老公就好鍾意下廚，所以煮飯會交畀老公負責，Winki就負責做家務！」

未計劃追第二胎

轉眼兒子進也今年12月便滿三歲，曾經揚言唔會做怪獸家長的她，表示今年兒子已經上幼兒班，不過因為疫情關係仍未開學，她亦繼續堅持信念，給兒子自由發展空間。賴慰玲接受本刊訪問時表示：「冇幫個仔報興趣班，要發掘吓佢有乜嘢興趣先，最緊要喺輕鬆氣氛下學習！」鍾意小朋友又愛湊仔，卻未有努力追多個，她坦言一切順其自然：「依家咁嘅時勢，暫時唔會諗住！呢樣嘢自然發生就會發生！」提到生第一胎時，她曾透露驗血時血指數出現問題令私家醫院拒收症，她卻澄清說：「其實喺成個孕期都係好舒服健康，一切都係好正常冇問題。」對於原本諗住順產卻因陣痛36小時，最終要剖腹誕下兒子，俗稱「食全餐」有否令她對再生BB產生恐懼？她繼續母愛氾濫說：「完全唔會，呢個係女人必須經歷嘅嘢，其實每個Moment 嘅經歷都係好珍貴，絕對唔會有恐懼同壓力！」

對老公毫不霸氣

近日有份演出的新劇《反黑路人甲》正在熱播，首演社團大家姐的賴慰玲，甫出場已經霸氣十足，演出非常亮眼，但Winki卻認為霸氣一面其實更貼合她個人性格，反而要她演柔情似水更大挑戰！話雖如此，但本刊卻發現賴慰玲在家對住老公毫不霸氣，更是個超級賢內助，日前不用開工，她即變師奶強人，在寓所露台一力做清潔，攞住濕毛巾騰來騰去，踎低抹地清潔露台欄杆，即使身旁老公只顧講電話未有幫手，她亦毫無怨言。對於為頭家事事親力親為，賴慰玲坦言：「我好鍾意演戲，亦都好享受湊仔做家務，呢兩樣嘢都咁鍾意自然唔會覺得辛苦！」34歲賴慰玲原來不止演技超班，做老婆一樣超晒班！