34歲周秀娜破例再sell性感 同Dada做姊妹造型百變又sexy
廣告
近年收起性感嘅周秀娜，由𡃁模轉型做演員，唔sell身材 sell實力，成功殺出一條血路。不過佢最近喺新片《家有囍事》 中又要再次行性感，有一幕全身包住條毛巾，內裡只著底褲嘅場口，起飛腳一剎那令人充滿遐想！
撰文、圖片：東方新地
周秀娜做性感打女 只圍浴巾打到癲
電影中嘅周秀娜（Chrissie）同陳靜（Dada）飾演老千姊妹花，造型百變又sexy，周秀娜話因應劇情而破例：「今次同陳靜 做兩姊妹，佢賣腦我賣力。大露背都係因應劇情需要而唔係刻意賣弄性感！拍嘅時候亦清場做足安全措施，唯一困難，係點樣打住但要捲得條毛巾靚。」Dada就話雖然以往同Chrissie合作過好多次，但都冇對手戲，今次演姊妹大家都好有默契。
Chilam做俠盜 大讚張繼聰搞笑
至於男主角張智霖孖張繼聰同黃百鳴飾演俠盜三兄弟，Chilam話對住張繼聰經常忍唔到笑：「阿聰真係好搞笑，令我每日都好期待開工，而打戲就交畀兩位女演員！」張繼聰透露戲中同Dada係一對歡喜冤家：「我喺戲入面冇乜長處，主力運輸，千術、魔術都冇我份，所以就好花弗咁追女仔。」
