34歲吳雨霏慶生飯局約約餅碎無佢份幸福人妻拖仔女放電容貌終曝光

Jun 10 2020

婚後家庭至上的吳雨霏（Kary），自從一對仔女出世後更無心戀戰，幾乎全面停工專注照顧家庭，肺炎疫情陪仔女閉關多時，近日見疫情稍緩， Kary即廿四孝好媽帶同仔女出關去沙灘放電，享受一下陽光與海灘，兩歲兒子Asher同九個月大囡囡Galilee同時曝光，原來一對仔女同Kary似足餅印。貼心湊仔女享受家庭樂之餘，近日Kary還出關同好姊妹Stephy（鄧麗欣）及區文詩提早慶祝34歲生日，餅碎合體繼續飛起被指曾爆她小產的「大口」Miki，姊妹情一去不返！

原文刊於《東方新地》

吳雨霏幸福人妻拖仔女放電

曾經歷小產傷痛的吳雨霏，現時已經成為幸福人媽，大仔Asher今個
月19日便滿兩歲，轉眼囡囡Galilee亦已經九個月大，低調享受家庭生活
的Kary，即使在個人社交網po仔女生活照，都不曾讓仔女正面見樣，不
過百密都會一疏，日前Kary帶同一對仔女去沙灘放電，兩個寶貝容貌終
於曝光。

樂於享受家庭生活的吳雨霏，甘為照顧一對仔女放下幕前演出，近日陪仔女閉關抗疫多時的她，見疫情稍有緩和，即帶仔女到沙灘放電，更同囝囝一齊玩沙，兩歲兒子蹲在沙堆玩到忘晒形，超級可愛！

除咗不停陪囝囝 Asher玩之外，吳雨霏當日亦帶同九個月大的囡囡Galilee同行，囡囡全程由工人姐姐用孭帶孭住，非常乖巧，仔女更同 Kary一個餅印。

兩歲囝囝Asher眼仔碌碌、嘴唇厚厚似足媽咪，而全程由工人姐姐用孭帶孭住的囡囡Galilee，眼睛較似爸爸，不過鼻仔同嘴仔都同媽咪似足餅印，對住一對得意仔女， Kary湊仔女極之享受，當日雖然還有一名女親友同行，加埋有工人姐姐幫手，不過， Kary全程貼身照顧大小寶貝，不時陪囝囝玩堆沙，又拖囝囝去水邊玩水，兩歲Asher玩到成身濕透，Kary即緊張幫囝囝換上乾淨衫，不過廿四孝媽咪無偏心，雖然囡囡仲細未識玩沙，但Kary邊陪囝囝玩仍不時去逗囡囡，怕囡囡著涼，急忙為囡囡腳仔摟上毛巾，相當細心。

被爆小產友情破裂 Kary同Miki再冇聯絡

雖然湊仔女大個天，不過， Kary亦未有忽略好姊妹，日前她出關同鄧麗欣及區文詩，提早預祝快滿34歲大日子。其實16歲便加入Cookies入行的Kary，由九餅變四餅女，同好姊妹打拼多年才獨立發展，餅女齊上齊落感情深厚。不過，16年11月被爆年初小產秘密，有指爆料人是當時剛陀B不久的Miki，自覺被好姊妹出賣的Kary，同Miki亦從此斬纜，四年來不相往來。據知情者透露：「雖然件事過咗四年，Kary依家又有兩個小朋友，不過嗰次小產對佢打擊太大，偶然提起都會喊，加上被姊妹出賣好hurt，同Miki完全冇來往！」日前餅碎合體賀Kary34歲生日，Miki繼續被飛出局，相信呢個傷害好難撫平。