33歲樂瞳公然接客 揚言歡迎新手老手交流

原文刊於《東方新地》

樂瞳17年離巢無綫後，拍過一部電影，志不在此，不時在社交網貼出周遊列國遊埠、歎美酒佳餚嘅相，又不時大派福利騷胸露線，比起還做藝人時谷人氣更加落力。近日樂瞳透露剛獲得人生第一張卡片，原來佢剛成功考獲品酒師牌，仲大搞洋酒生意，在社交網貼埋私人聯絡電話為其洋酒生意速銷，又表示有興趣者可以此電話聯絡，更申明是本人接聽電話百分百親自接客，立即引起網民瘋狂留言「問價」，留言問「可唔可以同你傾電話？」、「可唔可以指定你送貨上門先？」對於呢類只問未幫襯嘅留言，樂朣統統親自回話「只談公事好嗎？支持吓啦﹗我親自接單﹗」，對於會唔會送貨就大吊大家胃口表示隨時「可能會有驚喜㗎」，為求谷生意明言「歡迎新手或經典豐富嘅人同我交流」，樂瞳親自接客，睇番佢嗰賣酒網，三百零蚊就有交易，一餐飯嘅價錢就可以同女神交流吓，係咪全宇宙最筍先﹗

六百蚊親自送上門 樂瞳保證：密密送

由於樂瞳出po接客後的反應相當踴躍，再出po強調電話whatsapp同WeChat絕對係佢本人，佢話就算聽唔到大家電話，都會以語音訊息回覆大家，最最最重要係佢正式同大家宣布會親自送貨，只要買滿六百蚊就可以送貨到指定地方，六嚿水就獲得女神親自送上門，此話一出，再次被網民洗版問係咪真係咁筍，樂瞳逐一回覆話多啲嚟密啲手一定會「密密送」咁話，喺疫市一定可以殺出一條新血路。

樂瞳著住性感低胸絲質睡衣同大家介紹靚酒，為接客超級瞓身。