28歲陳凱琳停工追女隨時生三個 50歲鄭嘉穎晒父子照比拼

撰文、圖片：東方新地

鄭嘉穎囝囝一歲生日越大越靚仔

時間過得真係快，眨吓眼鄭嘉穎同陳凱琳嘅囝囝鄭承悅（Rafael），喺上星期五情人節當 日一歲生日，兩公婆特意為寶貝開p慶生，見Rafael愈大愈靚仔，嘉穎都忍唔住將父子照比 拼，似乎Rafael比爸爸更靚仔㖭！

鄭嘉穎晒父子照比拼兩父子餅印一樣

首次同囝囝過生日，鄭嘉穎同陳凱琳特別為Rafael開p慶祝，嘉穎喺IG開心share一家 三口嘅溫馨照片，並留言：「祝大家情人節快樂！祝Rafael一歲生日快樂！」之後嘉穎更將自 己同Rafael嘅側面照比拼，兩父子餅印一樣，不過有唔少網民就話囝囝比老竇更靚仔！媽媽陳凱琳都不甘示弱，大晒多張同Rafael咀嘴嘅親熱母子照，仲話呢一年對佢嚟講變化好大，自爆經常處於素顏、疲累但又幸福嘅Mom-Mode，要捱眼瞓湊仔，佢又多謝老公嘉穎落力照顧囝囝，希望囝囝快高長大，更笑言好愛好愛Rafael，要不停地錫佢，勁sweet囉！

陳凱琳有仔萬事足 寧願做母后不做視后

兒子鄭承悅（Rafael）於2月14日情人節滿一歲，陳凱琳幾乎日日攬住前世小情人晒幸福，表示好唔捨得囝囝大得咁快，另一方面又高度讚揚老公鄭嘉穎是個百分百好爸爸，努力工作搵錢養家的同時，亦錫到個仔燶，身為阿媽唔止冇呷醋，仲好開心。囝囝Rafael令陳凱琳與鄭嘉穎享受為人父母，追多個女湊成「好」字就更加圓滿，據知陳凱琳已決定做全職媽媽，約滿無綫後將不再續約，全力為鄭嘉穎生個小公主，相夫教子，寧願做母后都唔恨視后。

隨時生三個 最希望追多個女

結婚生仔令鄭嘉穎修心養性，陳凱琳功不可沒，陀B時曾表示產後會繼續幕前工作的 她，因為囝囝而計劃有變，據知情者透露：「生完B餵人奶，Grace(陳凱琳)已經對囝囝寸步 不離，之後就更加唔使講，睇住Rafael呢一年成長每個moment，Grace根本唔想再出嚟做 嘢，即使嘉穎話同佢去旅行二人世界，佢都要帶埋個仔去。生完冇耐Grace已經話會再繼續生，不過嘉穎唔想佢咁辛苦，所以plan咗Rafael一歲先開工造人，第二胎出世，囝囝兩歲就差唔多，佢哋好想追個女，仲話係女就收工，仔就再追多個，所以Grace唔再接劇，約滿無綫都唔會再續喇！以後只會接啲簡單又唔辛苦嘅代言工作，專注做賢妻良母。」

事實上，形象健康的陳凱琳產後代言工作不絕，深受客戶歡迎，唔拍劇一樣吸金力強 勁，產後只為無綫拍過一個旅遊節目《仨心友行》，可見她引退之決心。28歲的陳凱琳幸福 滿瀉，早前她接受訪問更承認完全沒有復出拍劇的時間表，家庭排第一，當務之急當然是為 鄭嘉穎追個女先，年過半百的鄭嘉穎有心有力，相信鼠年好快就有喜訊。