27歲有米何雁詩倒貼嫁36歲鄭俊弘 搲爆贊助誓要豪一次
廣告
鄭俊弘17年背未婚妻撻著何雁詩，被封賤男形象跌谷底，戀情不被睇好，不過二人愈愛愈高調，今年元旦日（1月1日），何雁詩在社交網上載婚紗照自爆嫁得出，準備做鼠年新娘。出身有米家庭的何雁詩，表示會去美加酒莊搞婚禮，話就話一切從簡，都要請埋一班親戚及身邊友好，婚禮開支再加機票 住宿，埋單條數都唔嘢小，鄭俊弘儲蓄多年的老婆本都應該搞唔掂，不過娶到何雁詩就有運行，為了風光大嫁，誓要有個難忘婚禮，新娘倒貼在所不計，邊個話做小三冇好結果㗎？
撰文、圖片：東方新地
鄭俊弘、何雁詩自爆求婚過程
鄭俊弘與何雁詩拍拖兩年半，期間傳過感情有阻滯，何雁詩更被指在外國冧鬼仔，不過無損二人感情，現在更修成正果，早前鄭俊弘在蘇梅島求婚成功，何雁詩冧爆say yes，元旦日何雁詩在社交網公布婚訊後，二人每次出席公開活動都興奮大講年底婚禮籌備的進度。
何雁詩恨嫁 準新娘話晒事
其實27歲的何雁詩一直恨嫁，鄭俊弘求婚成功後她即著手搞婚禮，未婚夫搵幾多、老婆本有幾多？何雁詩當然一清二楚，據知籌備婚禮的主要開支都由女家負責，而鄭俊弘只努力搵了唔少贊助，慳得就慳。知情者透露：「Step（何雁詩）自細對婚姻有憧憬，好命嘅 一生人嫁一次，婚禮梗係要搞得好好睇睇，再加上屋企有米，父母錫到燶，絕對唔可以失禮，不過Step都知Fred（鄭俊弘）經濟能力有限，最後佢哋決定去美加搵個酒莊搞，有睇頭 又不失浪漫。成個婚禮預算一定過百萬，因為要請埋男女家親戚同一班真係要好嘅朋友，Step拍晒心口叫Fred唔使擔心，仲話一定會搞掂。」
搞婚禮易嘈交二人貌合神離撐枱腳
搞婚禮絕對係考驗一對準新人嘅時候，意見不合嘈交就一定會有，而鄭俊弘與何雁詩女尊男卑亦唔係今時今日嘅事，日前本刊記者見鄭俊弘在尖沙咀閒逛然後會合何雁詩一齊食晚飯，離開時見二人貌合神離，非常冷淡，希望只係籌備婚禮攰得滯啦！
