陳瀅選無綫5大當家花旦 龔嘉欣一個原因排第二 邊位得第一？

陳瀅自認年資最短 心目中花旦排龔嘉欣第2？

陳瀅在早前接受林柏希《月傾會》訪問的片段再次受到網民的關注。在訪問中陳瀅被問到傳媒總括無綫依家五大花旦，分別有陳瀅、蔡思貝、湯洛雯、龔嘉欣同高海寧，要求陳瀅親自排無綫花旦地位。她毫不猶豫將兩年前曾封后的蔡思貝排第一，龔嘉欣就排第二，自認自己花旦地位排最尾：「第一，一定係思貝啦，因為思貝已經係兩年前嘅視后，之後龔嘉欣啦，嘉欣好似做咗最喜愛女角色，我自己最尾！因為我係咁多個之中年資最短，佢哋早入行過我㗎嘛！」

龔嘉欣句句有骨寸陳瀅惹禍

龔嘉欣早前出席活動時，提到陳瀅等花旦崛起競爭激烈，龔嘉欣即句句有骨指自己與陳瀅同年，只是自己資歷深，她表示：「我是捱返來的，19歲簽給TVB，由一個小蕃薯捱吓捱吓到現在都好感恩。」至於問到有關陳瀅在《美麗戰場》的表現時，龔嘉欣就避而不談，只回應道：「見網上精華片段的討論性好高，我更希望大家討論我演的台慶劇《新四十二章》，角色很有發揮，我現已學識斬豬肉，成就解鎖很開心。」

龔嘉欣食詐糊 《新四十二章》終極告吹

早前龔嘉欣句句有骨擺明葡萄陳瀅第一套劇《美麗戰場》擔正就有份上位爭視后，隨後有傳無綫高層出手，一心把劇集《新四十二章》煞停壓一壓龔嘉欣的氣焰，結果大家有目共睹，最後此劇終極被抽起，改由黎耀祥及朱晨麗主演的《輕‧功》頂上。

龔嘉欣缺席台慶+節目巡禮

日前無綫抽起陳豪、龔嘉欣主演的《新四十二章》，令龔嘉欣就銳氣受挫，後來又指已排好12月播映，今又有消息指TVB彈入又彈出，變陣改播黎耀祥新劇。雖然同樣是《新四十二章》主角的陳豪有份出席巡禮，除了未有龔嘉欣的身影之餘，就連台慶龔嘉欣亦不被安排位置。

出活動回應陳瀅事件：「其實大家都知道發生咩事」

對於疑似暗串陳瀅的言論，龔嘉欣否認說過那些話，直言實冇去講其他人，亦冇去評論其他人，仲話自己知道冇咁講過就OK，見到陳瀅不會感到尷尬，被問到時候是否找過陳瀅解釋事件，龔嘉欣斬釘截鐵表示：「冇冇冇！其實大家都知道發生咩事，又係呢個行業嘅人，大家都係笑吓。」網民對二人不和狂食花生：「佢哋和唔和唔知，陳瀅有無咁大影響力令套劇抽起嘛？」、「阿龔索好多！」、「邊個先係是非精？」

龔嘉欣自爆心臟出問題

龔嘉欣在活動上先解釋缺席《節目巡禮》是很因為早已向公司請了一個月大假休息，期間和一班朋友去了日本旅行，返港後身體出現問題才未能出席，她說：「因天生心臟血管問題，台慶需要好長時間排練，所以公司都好體諒（即係咩事?）血管位生歪咗，如果要做手術要開胸，屬於大手術，醫生都建議唔好做。公司好錫我，嚟緊已經安排咗拍劇，係一個正能量嘅角色。」

兩劇角逐視后 一切依從公司安排

對於《新》劇兩度被抽起，龔嘉欣即時賣口乖表示該劇將安排與大陸同步播映，需要重新配音及剪接，所以才會兩度改期，仲擦晒鞋話：「以公司安排為大前提，只要對部劇好，做演員都會配合。」

龔嘉欣今年將憑《十八年後的終極告白2.0》及《回歸光影頌：究竟天有幾高》兩劇入圍角逐視后，她信心滿滿表示：「一定要對自己有信心，但最開心係套劇令觀眾有共鳴，一齊陪笑陪喊，（對邊套比較有信心？）《十八年》，因為我同譚俊彥喺入面都合作得好好，大家創造咗好多驚喜出嚟。」