黃翠如爆睇過洪永城全相 蕭生蕭太踩界講鹹濕嘢收投訴

撰文、圖片：東方新地

黃翠如爆洪永城大鑊內容不雅接獲400宗投訴

台慶一如以往嘅大型歌舞表演當然唔少 得，仲有大棚人圍爐玩遊戲，當中由蕭正楠、黃翠如夫妻檔聯同兩大密友洪永城及曹永廉演出嘅「真假遊戲」，翠如喺節目中自爆睇過洪永城全相，又嘲其性器官短小，仲話：「就係因為睇過佢先鍾意阿蕭！」因為內容不雅接獲400宗投訴，事後蕭生蕭太都知衰，翠如話：「我有檢討過，好似係有啲不雅，以後唔可以太踩界。」

蕭正楠護航代妻道歉 洪永城澄清「無被睇過全相」

至於被洪永城揶揄淫賤不能移，翠如否認睇過對方全相：「其實我都係同大家同步睇嘅電視畫面，問阿蕭啦，佢哋成日一齊去廁所。」阿蕭亦為老婆護航：「對白都係度出嚟，因為大家太好朋友，講嘢唔會勒住。（怕唔怕人哋女友嬲？）洪永城見到女友就會重振雄風啦！」洪永城事後亦表示當晚大家照稿讀，佢亦都話會檢討日後說話要小心，並強調只係娛樂大家，澄清翠如冇見過佢全相。

小生花旦曬冷 Do姐欽點陳豪開金口

台慶當晚另一環節，由陳豪、陳展鵬、馬國明、袁偉豪、胡定欣、唐詩詠、李佳芯、蔡思貝及陳煒等多位小生花旦，分成男女兩組進行歌唱比賽，一直扭扭擰擰嘅陳豪以為可以匿喺人群後蒙混過關，點知最終難逃一劫，由Do姐鄭裕玲親自出馬點名叫佢開金口，最終阿Mo開腔唱咗幾句「我我我為了愛情」，全場爆笑！