黃日華父女互相扶持孖住睇醫生 痛失摯愛曾困廁所唔見人

原文刊於《東方新地》

黃日華失愛妻生無可戀 曾困廁所唔見人

黃日華對愛妻梁潔華從一而終的黃日華，陪妻抗癌七年衣不解帶照顧周到，可惜今年五月梁潔華因器官衰竭撒手人寰，遺下深愛他的華哥及孝順女黃芷晴。枕邊人突然離去，傷心欲絕的華哥鐵漢亦倒下，傷痛難以釋懷，足足一星期將自己困在家中廁所不願見人，生無可戀似等死，他形容當時的自己沒有了寄託，沒有目標，直至想及對亡妻的承諾，黃日華才猛然醒悟不能再這樣下去！

為照顧好女兒，黃日華不再困住自己，父女互相扶持走出傷痛。據知情者透露：「華哥好錫華嫂，太太就係佢人生支柱，華嫂患病嗰時，佢推晒所有工作悉心照顧太太，雖然見到華嫂撐得好辛苦會好心痛，但陪伴對佢嚟講已經係一種安慰，到華嫂走咗，失去最愛令華哥冇晒方向，諗到唔開心就忍唔住喊，唔想畀個女見到，就匿埋喺廁所，雖然佢應承過太太要戒煙，但嗰時佢已經傷心到崩潰，只有靠食煙麻醉自己，身邊班朋友都擔心佢會出事，連個女都唔知點安慰佢！好彩後尾佢猛然諗起老婆嘅叮囑，先唔畀自己再沉淪落去，開始將心裡面嘅唔開心，同個女互相傾訴，頭嗰兩個月，兩父女喺屋企經常傾番以前一家人嘅生活點滴，成日都會講到喊，但兩個人一齊面對可以互相安慰，起碼唔會孤伶伶諗埋一邊！」

父女同病相憐孖住睇醫生

為圓太太遺願積極生活的華哥，靠愛女撫平傷痛，更努力戒煙，同女兒黃芷晴互相扶持走出陰霾，早前父女同病相憐，齊齊病倒，當日黃日華駕車接同女兒到何文田醫務所睇醫生，雖然身體不適，不過黃芷晴仍刻意化妝掩飾病容，父女在診所內搵了個近角落的梳化位置坐低，見女兒瞌埋眼養神，華哥亦緊張問愛女身體狀況！父女睇病約四十五分鐘，攞完藥後匆匆趕回大埔寓所休息！

幸得三哥扶持開解

在太太離世接近半年，黃日華逐步走出傷痛，早前應好兄弟苗僑偉邀請，一齊上崔健邦、張秀文主持的清談節目《諸朋好友》受訪，提起愛妻掩不住傷心難過，更表示睇住愛妻離去一刻是他人生最最最難受！一度講到哽咽熱淚盈眶。經歷喪妻之痛，華哥更感謝好兄弟苗僑偉在他最難捱的日子相伴開解，他說：「三哥收到消息，第一時間打電話問候我，接下來嗰個幾月，他朝早就打畀我，問我起身未呀去食早餐，又或者起身未呀一齊去飲茶，喺嗰段時間陪住我同開解我，喺我太太設靈、出殯嗰兩日，又一早到場幫手，義無反顧幫我太太搵靈位，呢啲係任何金錢都買唔到！」同是五虎出身的黃日華與苗僑偉早已私交甚篤，三哥三嫂在華哥失去最愛的日子就如同他的心靈雞湯。好友透露：「三哥三嫂同華哥華嫂係深交，大家可以話睇住對方拍拖、結婚生兒育女，三哥最清楚華哥脾性，知佢最愛就係老婆，喪妻對華哥打擊好大，三哥怕老友諗埋一邊，就日日搵住華哥，除咗安慰華哥之外，亦同華哥傾番好多以前大家嘅經歷，等華哥可以分散啲唔開心嘅情緒，三嫂又作為長輩去鼓勵芷晴，嗰段過渡期，三哥日日嗌華哥父女去佢屋企食飯，就係唔想佢兩父女困埋亂諗嘢！」

整理過萬張亡妻照片修讀香薰蠟燭導師課程

雖然同愛妻天人永隔，不過華哥對太太的思念仍然生生不息，連月來他細心整理愛妻遺物，更將自己和太太的手機內相片全部列印出來，將過萬張相片全部逐一剪裁好過膠收藏，那份對妻子至死不渝的愛令人動容，就連女兒芷晴看在眼裡，亦替天上的媽媽感動。父女生活逐漸回歸正軌，開始回復工作的芷晴，亦擔心爸爸一個人會胡思亂想，經常鼓勵爸爸搵節目，不過因愛妻離去要重整心情，華哥暫時未有復出拍劇計劃，反而在愛女感染下，父女會一起上堂學造香薰蠟燭，以手作治療減輕心靈痛楚。據知情者透露：「芷晴係讀設計，本身就好鍾意做手藝，華哥見個女整香薰蠟燭好得意，芷晴就乘機拉埋爸爸一齊去學，等爸爸可以有精神寄託，佢哋讀嘅係香薰蠟燭導師課程，讀完可以開班授徒，三哥同張兆輝都好鼓勵華哥發掘多啲興趣，華哥愈整愈有興趣，仲整咗好多香薰蠟燭放去靈位送畀華嫂，依家華哥好積極生活，因為佢應承過老婆，要好好照顧個女同岳母，為咗圓太太遺願，佢仲好努力戒煙，等身體更健康！」有女兒在身邊，應該就是華哥的最佳良藥，再傷痛也要圓太太心願，堅強好好生活！